Амма улууһун Эмис нэһилиэгэр «Эмис эр дьоно» уопсастыбанай түмсүү бэрт көхтөөхтүк үлэлиир.
Нэһилиэк баһылыга Прокопий Бубякин иһитиннэрбитинэн, «Эмис эр дьоно» түмсүү былырыын саас кулун тутарга 70-ча киһи нэдиэлэ устата бэйэ-бэйэлэрин солбуйса сылдьан, мас кэрдибиттэр.
Бэс ыйын 7 күнүгэр ол кэрдибит мастарынан нэһилиэк түөрт муостатын өрөмүөннээбиттэр уонна үс саҥа муостаны туппуттар.
«Нэһилиэкпитигэр уопсайа 7 муоста өрөмүөннэммитэ. Онтон үһэ — үрэххэ тиийэр олус наадалаах муоста«, — диэн бэлиэтиир Прокопий Петрович.
Бу күннэргэ Алексей Соловьев салайааччылаах түмсүү быйылгы сылга ыытыллар үлэни, араас тэрээһиннэри былаанныыр сүбэ-мунньаҕы ыытта. Нэһилиэк эр дьоно бэйэлэрин этиилэрин киллэрдилэр уонна үлэ былаанын торумнаатылар.
Кулун тутар 2 күнүгэр ыытыллыахтаах улуус эр дьонун уопсастыбаннай тэрилтэлэрин уопсай мунньаҕар Эмис нэһилиэгин эр дьонун дэлэгээссийэтэ тэрээһиннээхтик хомуллан киирэн, быйылгы “Беларус” тыраахтар оонньонор күрэхтэһиитин балаһыанньатыгар бэйэлэрин санааларын тиэрдиэхтэрэ, ол кэннэ нэһилиэктэрин эр дьонугар бу тэрээһин туһунан билиһиннэриэхтэрэ.
Нэһилиэк олохтоох дьаһалтата эр дьон ыытар үлэтин субуотунньуктарынан, тэрээһиннэринэн уматыгынан уонна харчынан өйүөҕэ.
Елена ПОТОЦКАЯ, “Саха сирэ” хаһыат, edersaas.ru
Хаартыска – Прокопий Бубякин тиксэриитэ уонна “Эмис нэһилиэгэ” МТ инстаграмыттан скриншот.