Эминэн хааччыллыы, хааччахтыыр миэрэлэри тутуһуу уонна кирииби утары быһыы
Бу туһунан бүгүн куйаар ситиминэн мунньахха Ил Дархан Айсен Николаев улуус баһылыктарыгар тоһоҕолоон эттэ.
Сэтинньи 24 күнүнээҕи туругунан, коронавируһунан ыалдьыы түбэлтэтэ өрөспүүбүлүкэ 23 улууһугар бэлиэтэннэ. Өскөтүн санитарнай-эпидемиологическай турук кэнники нэдиэлэҕэ Дьокуускайга арыый бигэтийэн эрэр эбит буоллаҕына, улуустарга дьаҥнааһын элбээтэ. Ону сэргэ, куораттарга да, улуустарга да ыараханнык ыалдьыбыттар ахсааннара аччаабат. Билиҥҥи туругунан реанимационнай отделениеларга 116 киһи сытар, итинтэн 32 киһи ИВЛ аппараатыгар холбонон сытар. Өрөспүүбүлүкэ үрдүнэн куойка үс тыһыынчаҕа тиийбит. Олор бүгүҥҥү күн туругунан 75% туолан тураллар, Дьокуускайга — 83% толору. Бу туһунан бүгүн, сэтинньи 24 күнүгэр, Ил Дархан Айсен Николаев улуустар, куорат уокуруктарын баһылыктарын кытары эпидемиологическай балаһыанньанан уочараттаах мунньахха иһитиннэрдэ.
Айсен Николаев өрөспүүбүлүкэҕэ доруобуйа харыстабылыгар туох-ханнык иннинэ, бастакынан, ордук кутталлаах бөлөххө киирсэр дьону кэмигэр балыыһаҕа киллэрии соруга турарын бэлиэтээтэ. Доруобуйа харыстабылын министиэристибэтигэр стационардарга эмтээһини күүһүрдэргэ, поликлиникаларга кутталлаах бөлөххө киирсэр пациеннары эмтээһин пуоруматын билиини, быһаарыыны өссө күүһүрдэн биэрэргэ соруйда. ОРВИ элбээбитинэн, өрөспүүбүлүкэ аптекаларын эминэн-томунан хааччыйыы сүрүн сорук быһыытынан туруорулларын тоһоҕолоон эттэ.
Ил Дархан сорудаҕынан «Биир ньыгыл партия» эрэгийиэннээҕи салаатын бэрэстэбиитэллэрэ тыын суолталаах уонна коронавируһу утарар эмтэринэн аптекалар хайдах хааччыллан олороллорун күн ахсын мониторинныылларын иһитиннэрдэ. Тутулуга суох бэрэбиэркэлэр норуот фронун уонна өрөспүүбүлүкэ борокуратууратын өттүттэн эмиэ оҥоһуллаллар. «Сорох улуустар аптекаларыгар тыын суолталаах, ону сэргэ, тастан эмтэнэргэ коронавируһу утарарга, доруобуйаны чэбдигирдэргэ иһиллэр эмтэр суохтарын бэрэбиэркэлэр көрдөрдүлэр. Бу кыһалҕаны улуустар баһылыктара Росздравнадзору кытары чугастааҕы кэмнэргэ быһаараргыт ирдэнэр«, — диэн бэлиэтээтэ Ил Дархан.
Сэтинньи 9-23 күннэригэр СӨ Ил Дархан дьаһалтатын уонна Бырабыыталыстыбатын үлэһиттэрэ Аллайыахаҕа, Мэҥэ Хаҥаласка, Өлөөҥҥө, Ньурбаҕа, Орто Халымаҕа, Сунтаарга, Эбээн Бытантайга үлэлээбиттэр, онно аптекаларга эмп-томп төһө баарын-суоҕун бэрэбиэркэлээбиттэр. Бу бэрэбиэркэлэр түмүктэринэн, сорох улуустарга тыын суолталаах эмтэр суохтара эбэтэр адьас аҕыйахтара чопчуламмыт. Оттон Аллайыахаҕа уонна Орто Халымаҕа эмп сыаната үрдэтиллибитэ биллибит. Маны сэргэ, Аллайыахаҕа, Тааттаҕа, Орто Халымаҕа, Өлөөҥҥө уопсастыбаннай сирдэргэ —Арассыыйа Почтатын отделениеларыгар уонна Сбербааннарга салгын рециркулятордара уонна социальнай тэйиччи сылдьыы бэлиэлэрэ суохтара ыйыллыбыт. Бу кэһиилэри туоратар туһуттан, улуус баһылыктарыгар административнай хамыыһыйалар үлэлэрин күүһүрдэн биэрэргэ сорук туруорулунна. Балаһыанньа этэҥҥэ буоларын туһугар хааччахтыыр миэрэлэр уонна санитарнай-эпидемиологическай ирдэбиллэр бары социальнай тэрилтэлэргэ булгуччу тутуһуллуохтаахтара ыйылынна.
COVID-19 утары охсуһууга ылыллар миэрэлэр тустарынан Алдан, Бүлүү уонна Өлүөхүмэ баһылыктара кэпсээтилэр. Роспотребнадзор сүбэлэрэ, ирдэбиллэрэ бары тэрилтэлэргэ, ол иһигэр мэдиссиинэ тэрилтэлэригэр төһө тутуһуллалларыгар хонтуруол күүһүрбүтүн иһитиннэрдилэр. Рейдэлэр оҥоһуллалларын, уопсастыбаннай сирдэргэ уонна элбэх кыбартыыралаах дьиэлэргэ дезинфекциялыыр үлэлэр ыытыллалларын эттилэр. Баһылыктар кутталлаах антисептиктары быһаарыыга уонна тутан ылыыга ыытыллар үлэлэр тустарынан туспа иһитиннэрдилэр.
Роспотребнадзор Саха Сиринээҕи управлениетын салайар Маргарита Игнатьева улуустар баһылыктарыгар өрөспүүбүлүкэҕэ кирииби утары быһыыны оҥоруу хампаанньата ахсынньы 1 күнүгэр түмүктэниэхтээҕин санатта. Бүгүҥҥү күҥҥэ кирииби утары вакциналар Үөһээ Бүлүү, Үөһээ Халыма, Бүлүү, Горнай, Мэҥэ Хаҥалас, Муома, Нам, Уус Алдан, Чурапчы, Хаҥалас улуустарыгар уонна Дьокуускайга толору тиэрдиллибиттэр. Өссө бу күннэргэ вакциналары сөмөлүөтүнэн Хотугу уонна Арктика оройуоннарыгар тиэрдэллэр.
Мунньах түмүгэр Айсен Николаев эпидемиологиическай быһыы-майгы хайдах буолара улуустар, куорат уокуруктарын баһылыктарын дьаһайыыларыттан уонна хоруона хамсыгын утары охсуһар суһал ыстааптар ылар миэрэлэриттэн тутулуктанарын бэлиэтээтэ.
«Коронавирус дьаҥын утары охсуһуу тэрээһиннэрин сэргэ, эминэн-томунан хааччыллыы боппуруоһа, хааччахтыыр уонна санитарнай-эпидемиологическай миэрэлэри тутуһууну хонтуруоллааһын сүрүн сорук быһыытынан туруоруллар», — диэтэ Ил Дархан улуустар баһылыктарыгар туһаайан.
СӨ Ил Дархан уонна Бырабыыталыстыба пресс-сулууспата
Андрей Сорокин хаартыскаларга түһэриитэ
+1
+1
+1
+1
+1
+1
+1