Ааспыт сууккаҕа Саха сиригэр эбии 244 киһи коронавируска сутуллубута билиннэ. Дьокуускай куоракка ыарыы балаһыанньата бигэ буоллаҕына, оройуоннарга элбээн иһэр. Онон өрөспүүбүлүкэҕэ ыарыы намтааһына бэлиэтэммэт. Бу туһунан Ил Дархан Айсен Николаев Суһал ыстаап уочараттаах мунньаҕар иһитиннэрдэ.
Суһал ыстаап билиҥҥи сүрүн соругунан өрөспүүбүлүкэ аптекаларын эминэн хааччыйыы буолар. Айсен Николаев бэлиэтииринэн, Росздравнадзор уонна муниципальнай тэриллиилэр отчеттара үтүө көрдөрүүлээҕин үрдүнэн бэрэбиэркэлэр ыытыллыбыттарын түмүгэр, үгүс аптекаларга коронавирус дьаҥын бохсор эмптэр суохтар диэн быһаарбыттар. Ордук Нерюнгри оройуонугар бу кыһалҕа баар эбит. Онон, Ил Дархан бу боппуруоһу быһаарарга миэрэлэри ыларга сорудахтаата.
Итиэннэ федеральнай бүддьүөттэн көрүллүбүт үбүнэн өрөспүүбүлүкэ балыыһаларыгар мэдиссиинискэй оборудованиелары атыылаһыы боппуруоһун суһаллык быһаарар ирдэнэрэ мунньахха бэлиэтэннэ.
Вице-премьер Ольга Балабкина ааспыт нэдиэлэҕэ Өлүөхүмэ оройуонугар оробуочай сырыытыгар суһал ыстаап дьаҥы бохсууга үлэтин бэрэбиэркэлээбитин иһитиннэрдэ. Кини бу нэдиэлэҕэ оройуон суһал ыстаабын уонна Өлүөхүмэтээҕи киин балыыһа сүрүн бырааһын кытта психоневрологическай интэринээккэ буолбут бөлөҕүнэн ыалдьыыга миэрэ ылыахтарын туһунан эттэ.
Роспотребнадзор Саха сиринээҕи управлениетын салайааччы Маргарита Игнатьева бэлиэтииринэн, ааспыт нэдиэлэҕэ Саха сирин үрдүнэн ОРВИ ыарыы элбээбит. Итиэннэ кириип утары вакцина Саха сиригэр кэлэн, Дьокуускайынан, Үөһээ Бүлүү, Бүлүү, Горнай, Мэҥэ Хаҥалас, Нам, Хаҥалас, Чурапчы улуустарынан тарҕаммытын, 7 тыһыынча киһи быһыыны ылбытын туһунан иһитиннэрдэ.
Ил Дархан уонна Бырабыыталыстыба пресс-сулууспата.
Андрей Сорокин хаартыскалара.