Эми-тому тиэрдии, мэдиссиинэ көмөтүн түргэнник оҥоруу уонна быһыы туһунан
Тастан эмтэнээччи ахсаана элбээбитинэн, улуустар уонна куораттар уокуруктарын суһал ыстааптара доруобуйа харыстабылын бастакы сүһүөх звенотун өйүүргэ, мэдиссиинэ үлэһиттэрин ноҕуруускаларын намтатарга бары миэрэлэри ылаллар.
Волонтердары тардан туран мэдиссиинэ биригээдэлэрин үлэлэрин өйөөһүн, стационардарга уонна аптекаларга эмп-томп саппааһа баар буоларын хааччыйыы, тастан эмтэнээччилэргэ босхо эми биэрии туһунан этилиннэ. Итинник соруктары СӨ Ил Дархана Айсен Николаев улуустар уонна куораттар уокуруктарын баһылыктарыгар туруорда.
«Билигин бастакы сүһүөх мэдиссиинэ звенотугар үлэ харгыстанымыан наада, амбулаторнай ыарыһахтарга эми-тому тиэрдиигэ, амбулаториялар үлэлэрин болҕомтолоохтук көрүөххэ, ол иһигэр эбии тэриллибит кииннэр, колл-кииннэр үлэлэрин көрүү ирдэнэр. Улуустар, учаастактар балыыһаларыгар дьон-сэргэ тоҕуоруһуутун, уочаратын таһаарымыахха. Бу соруктары суһаллык быһаарарга миэстэлэринэн суһал ыстааптар түргэн уонна чопчу быһаарыылаахтык үлэлииллэрэ ирдэнэр», — диэтэ эрэгийиэн баһылыга.
Оройуон балыыһаларын кылаабынай быраастара амбулаторнай ыарыһахтары босхо эминэн хааччыйыы боппуруоһун бэйэлэрэ быһаарыа суохтаахтар. «Эмп-томп бары ыарыһахтарга дойдуга олохтоммут уопсай бэрээдэгинэн тиэрдиллиэхтээх», — диэн бэлиэтиир Айсен Николаев.
Өрөспүүбүлүкэҕэ эпидемиологическай балаһыанньа билигин да уустук. Ааспыт нэдиэлэҕэ ыалдьааччы ахсаана элбээбитинэн көрдөрүү 75%-ҥа тэҥнэстэ. Онтон бу нэдиэлэ саҥатынааҕы дааннайынан, үрдээһин номнуо 45,7% тиийбит. Элбэх киһи Мэҥэ Хаҥалас, Алдан, Мииринэй оройуоннарыгар ыалдьыбыт. Дьааҥыга, Муомаҕа, Өлөөҥҥө, Эбээн Бытантайга дьоннор ыалдьан эрэллэрэ эмиэ бэлиэтэнэр.
Кэнники хонукка өрөспүүбүлүкэҕэ 1 233 киһи үтүөрбүт. Ыараханнык ыалдьыбыттар бытааннык да буоллар эмиэ үтүөрэллэрэ ыйыллар. Бүгүҥҥү күн туругунан өрөспүүбүлүкэ үрдүнэн реанимация отделениеларыгар 92 киһи сытар, итинтэн 16 ыарыһах ИВЛ аппараатыгар холбонон сытар.
Оҕолор ордук ыалдьаллара ыйыллар. Билиҥҥи туругунан ыалдьыбыт дьон уопсай ахсааныттан 30% оҕо. Маныаха Дьокуускайга оҕолор тэйиччиттэн олорон үөрэниигэ көһөрүллэннэр, ыалдьааччы ахсаана кэнники хамсаабакка турара этилиннэ. Онон билиҥҥи кэмҥэ дистанционнай үөртии сөптөөх диэн быһаарыыга кэлбиттэр.
Коронавируһу бохсууга үлэлэһэр суһал ыстааптарга вакцинацияҕа уонна ревакцинацияҕа кыра бырыһыан көрдөрүүлээх улуустарга уона Дьокуускайга тэтими күүһүрдэр наадата этилиннэ.
Андрей Сорокин (СИА) хаартыскаҕа түһэриитэ
+1
+1
+1
+1
+1
+1
+1