Бу күннэргэ Емельян Ярославскай аатынан хотугу норуоттар устуоруйаларын уонна култуураларын холбоһуктаах судаарыстыбаннай түмэлигэр Эдьигээн улууһугар анаммыт «Саха сирин устуоруйатыгар Эдьигээн улууһа» диэн быыстапка аһыллан үлэлиир.
Суолталаах тэрээһин Саха АССР төрүттэммитэ 100 сылыгар ананна. Быыстапка Эдьигээн улууһун устуоруйатын уонна култууратын кытта билиһиннэрэр.
Кэккэ истиэндэ эбэҥки национальнай оройуона социальнай-экэнэмиичэскэй сайдыытыгар сүҥкэн кылааттарын киллэрбит дьоҥҥо ананна. Экспозицияҕа Эдьигээн улууһун олохтоохторун булка уонна балыктыырга туттар тэриллэрэ көрдөрүүгэ турдулар. Уопсайа 100-тэн тахса эспэнээт турда.
Арассыыйа судаарыстыбатын каартатыгар Эдьигээн куората 1632 с. сайыныгар баар буолбута. 1930 сыллаахха Эдьигээн национальнай (эбэҥки) оройуона төрүттэммитэ. Бу сыллар тухары оройуоҥҥа балыктааһын, табаны иитии, бултааһын салаалара сайдан кэллилэр. Кэрэ, тыытыллыбатах айылҕалаах сиргэ туристар хото кэлэллэр.
Эдьигээн улууһун олохтоохторо сахалыы тылынан бастакынан тахсыбыт «Ахтыылар» кинигэ ааптара Афанасий Уваровскайынан, Эдьигээн райсоветын бэрэссэдээтэлэ Николай Шемяковынан, СӨ бастакы бэрэсидьиэнэ Михаил Николаевынан, көҥүл тустууга олимпийскай чөмпүйүөн Роман Дмитриевынан, аатырбыт хомусчут Иван Алексеевынан – Хомус Уйбаанынан киэн тутталлар.
Быыстапка алтынньы ортотугар диэри үлэлиэҕэ.
Елена ПОТОЦКАЯ, «Саха сирэ хаһыат».