Тыа сирин эмчиттэрэ дьаҥы утары күүскэ үлэлииллэр. Бу ханна?
Аан дойдуну аймаабыт ковид — 19 силиһэ — мутуга дириҥээн, бэл, тыа сирин дэриэбинэлэрин тумнубата. Төһө да харыстаммыттарын, санитарнай — эпидемиологическай ирдэбиллэри тутусталлар, син биир биирдиилээн ыалдьаллар.
Мэҥэ Хаҥалас Хочо бөһүөлэгэр учаастактааҕы балыыһа кылаабынай бырааһынан Анисимова Светлана Вадимовна үлэлиир. Кини салайар дьоҕус кэлэктиибэ бу саба бүрүүкээбит ковид — 19 ыарыыны утары үлэни былааннаахтык ыытар. Биэлсэр Захарова Аина Ивановна ол туһунан бу курдук аҕыйах тылынан сырдатта: «Син эмиэ атын сирдэргэ курдук, биһиги, Хочо бөһүөлэгин медүлэһиттэрэ, олохтоохтортон санитарнай — эпидемиологическай быраабылалары тутуһалларын ирдиибит. Ким эмит ыалдьыбытын биллэхпитинэ, тутатына, туох кыалларын оҥоробут: анаалыс ылабыт, хаан баттааһынын мээрэйдиибит, укуол туруорабыт, уопсай туругун кэтээн көрөбүт. Ыарахан ыарыһахтары Майаҕа ыытабыт. Сиэстэрэлэрбит, санитардарбыт уочаратынан Майаҕа киирэн ковидынан ыалдьыбыт дьону эмтээһиҥҥэ үлэлээн, быһаччы көмөнү оҥороллор».
Мин кэргэмминээн иккиэн ковидынан ыалдьыбыппытын бырааспыт Анисимова С.В. тута анаалыска ыытан, диагноз туруоран, суһаллык Майаҕа ыыппыта. Майа балыыһатын инфекционнай отделениетыгар 12 хонук эмтэнэн, үтүөрэн тахсыбыппыт. Үрүҥ халааттаах аанньалларбыт барахсаттар күнүстэри-түүннэри сүүрэн-көтөн, эмтээн -томтоон атахпытыгар туруордулар. Мин эмтэнэр кэммэр Хочоттон кэлэн үлэлии сылдьар сиэстэрэлэр, үөрэппит кыргыттарым Анастасия Аргунова, Ньургуйаана Николаева, Розалия Исакова бэркэ кыһаллан-мүһэллэн эмтээтилэр. Эмтиир бырааспыт Фёдорова Надежда Борисовна, күҥҥэ хаста да киирэн, көрөр- истэр, сүбэ — ама биэрэр, санаабытын көтөҕөр. Маны этэн эрдэхтэрэ үчүгэй быраас ыарыһаҕы эминэн-томунан, укуолунан эрэ буолбакка, үтүө-сылаас тылынан эмиэ эмтиир диэн.
Түгэнинэн туһанан, быраастарбар Светлана Вадимовнаҕа, Надежда Борисовнаҕа, сиэстэрэ, санитар кыргыттарбар барыларыгар махталбын тириэрдэбин!
Бу саҥа үүммүт сылга ковид — 19 ыарыы хаптайдар ханнык диэн санаанан суруйуубун түмүктүүбүн.
Елена Прокопьева, уопсастыбаннай кэрэспэдьиэн.