Мэҥэ Хаҥалас II Наахара нэһилиэгэр 448 киһи олорор. Итинтэн оҕотун ахсаана – 129. Балыыһа түөрт учаастагы көрөр: Наахара, Бырама, Тиэлиги, Чыамайыкы. Бу күннэргэ дойду үрдүнэн суоһаабыт коронавирус ыарыыттан көмүскэниигэ нэһилиэнньэ ортотугар былааннаах үлэни ыытыыны күүһүртүлэр.
edersaas.ru
Бу туһунан Наахара балыыһатын сэбиэдиссэйэ, Санкт Петербурдааҕы үрдүк үөрэх кыһатын педиатр идэлээх бүтэрэн 2004 сылтан үлэлии сылдьар (итинтэн 2012 сылтан сэбиэдиссэй) Светлана Вадимовна Анисимова бу курдук иһитиннэрдэ:
— Түгэнинэн туһанан, кылгастык устуоруйа быыһын сэгэттэхэ, Хочоҕо 1937 сылаахха бастакы балыыһа тутуллубута. 1966-2010 сылларга Наахара учаастактааҕы балыыһатыгар уһуннук кылаабынай бырааһынан ССРС доруобуйатын харыстабылын туйгуна, РСФСР үтүөлээх бырааһа Л.Е.Ефремова үлэлээбитэ. Билигин балыыһабытыгар кини аатын иҥэрээри туруорса сылдьабыт. Лидия Ефремовна үлэлиир кэмигэр элбэх үлэни ыыттарбыта. Ол курдук, 1992 сыллаахха – стационар, 1997 сыллаахха амбулатория туттарбыта. 2004 сыллаахха эдэр үлэһиттэргэ уопсай дьиэ үлэҕэ киирбитэ.
Онтон 2014 сыллаахха икки этээстээх толору хааччыллыылаах балыыһа “Үтүө дьыала “көмөтүнэн киирбитэ. Бу дьыл тохсунньутуттан оптимизацияланан, 5 үлэһиттээх врачебнай амбулатория буолла. Стационар улуус 4 №-дээх терапия отделениетын филиала буолла. Онно 8 киһи үлэлиир.
Кулун тутар ыйтан улуустааҕы инфекционнай балыыһа обсерваторий буолбутунан биһиэхэ көстө. Билиҥҥи туругунан биэс киһи атын нэһилиэктэртэн кэлэн эмтэнэ сытар.
Үөскээбит балаһыаньанан сибээстээн, сэрэтэр үлэ күүскэ ыытылла турар. Билиҥҥи туругунан маҕаһыын, балыыһа үлэлии олороллор, атын тэрилтэлэр үлэлэрэ хааччахтанна. 65 саастарыттан үөһээ саастаах 66 кырдьаҕаска дьоҥҥо биэлсэр уонна социальнай үлэһит сырыттылар. Дьиэлэринэн сылдьан мааска түҥэттилэр, уопсай туруктарын бэрэбиэркэлээтилэр. Хайдах бэйэни бу вирустан харыстанарга сүбэлээтилэр.
Олохтоох дьаһалта баһылыга П.П.Никитин, участковай полиция Н.А.Захаров уонна мин кыттыгас рейдэ ыыттыбыт, биирдиилээн бэсиэдэлэстибит. Мин уопсай туруктарын көрдүм.
Ити курдук, II Наахара нэһилиэгэр бу суостаах ыарыы тумнан ааһарын туһугар үлэ-хамнас ыытыллар.
Женни СТРЮКОВА, “Саха сирэ”
Хаартысканы С.Анисимова биэрдэ.