Бүгүҥҥү күҥҥэ Өймөкөөн улууһун киин балыыһатын эмчиттэрэ муҥутуур бэлэм ыксаллаах балаһыанньа эрэсиимигэр үлэлии олороллор.
edersaas.ru
Улуустааҕы киин балыыһа поликлиникатыгар ыарыһахтары көрөр бары былааннаах үлэ тохтоото. Учаастактааҕы терапевт быраастар регистратураҕа киирбит сайаапкалары дьиэлэринэн сылдьан көрөллөр-истэллэр. Улуус таһыттан кэлбит дьону инфекционист, эпидемиолог, терапевт быраастар Роспотребнадзор Өймөкөөннөөҕү территориальнай Управлениетын анал ыйыытыгар олоҕуран бэрэбиэркэлииллэр, кэтээн көрөллөр.
Бу күннэргэ улуустааҕы киин балыыһа кылаабынай бырааһа Ираида Харлампьева нэһилиэктэринэн сылдьан сэбиргэхтэтэр дьаҥ туруон сөп кэмигэр хайдах дьаһанан үлэлииргэ сүбэ мунньахтары ыытта, бэлэмнэммит обсерватордары көрдө-иһиттэ.
Маны тэҥэ эмчиттэр улуустааҕы ГИБДД үлэһиттэрин кытта айан суолугар суоппардары бэрэбиэркэлиир эриэйдэлэргэ сырыттылар.
Сахарнай диабеттаах, тыҥаларыгар хроническай ыарыылаах, хаан баттааһына кэһиллибит, кыайан хаампат дьон эмчиттэр болҕомтолоругар сылдьаллар. КДЛ, рентген-кабинет, ультразвуковой уонна функциональнай диагностика кабинеттара суһал мэдьиссиинэ көмөтүгэр бэлэмнэр.
Елена ПОТОЦКАЯ, «Саха сирэ» хаһыат, edersaas.ru