«Биһиги хас биирдии бэтэрээн Доруобуйаны эмтиир-чөлүгэр түһэрэр кииммитигэр эбэтэр Гериатрия киинигэр сытан эрэ доруобуйатын бэрэбиэркэлэнэригэр туох баар усулуобуйаны тэрийиэхпит”, — диэн Өрөспүүбүлүкэтээҕи 3 №-дээх килиниичэскэй балыыһа кылаабынай бырааһа, мэдиссиинискэй наука доктора Ольга Татаринова Аҕа дойду Улуу сэриитин, үлэ уонна тыыл бэтэрээннэрин, бэтэрээннэр огдооболорун, үтүөлээх кырдьаҕастары кытары көрсүһүүгэ иһитиннэрдэ.
Кинилэр ортолоругар Аҕа дойду Улуу сэриитин кыттыылааҕа, САССР норуотун хаһаайыстыбатын үтүөлээх үлэһитэ, СӨ бочуоттаах гражданина, СӨ бочуоттаах бэтэрээнэ, үлэ бэтэрээнэ, А.Е.Кулаковскай аатынан Судаарыстыбаннай бириэмийэ лауреата, Бүлүү улууһун бочуоттаах гражданина Кирилл Егорович Павлов,
Аҕа дойду Улуу сэриитин уонна үлэ бэтэрээнэ, РСФСР техническэй үөрэхтээһинин туйгуна Платон Иванович Харитонов, тыыл уонна үлэ бэтэрээнэ Ян Алексеевич Яковлев бааллар.
Саха бастакы лүөччүгэ, авиация полковнига, өрөспүүбүлүкэ норуотун хаһаайыстыбатын үтүөлээх үлэһитэ, Аҕа дойду Улуу сэриитин кыттыылааҕа, Кыһыл Сулус икки уордьан уонна Аҕа дойду Улуу сэриитин II истиэпэннээх уордьанын кавалердара Иван Федоров огдообото, сэрии кыттыылааҕа Раиса Васильевна Федорова, “Сэрии оҕолоро” – үлэ бэтэрээнэ Мария Александровна Ксенофонтова уонна бэтэрээннэр куораттааҕы сэбиэттэрин бэрэссэдээтэлэ Николай Александрович Тряпша бааллар.
Өрөспүүбүлүкэтээҕи 3 №-дээх килиниичэскэй балыыһа үлэһиттэрэ кинилэргэ махтал тылларын эттилэр уонна чэгиэн туруктаах уһун олоҕу баҕардылар.
Эҕэрдэ кэнниттэн ыалдьыттарга балыыһа кырдьаҕас дьон олоҕун хаачыстыбатын үрдэтэргэ хайысхаламмыт үлэтин-хамнаһын кэпсээтилэр.
Сэрии кыттыылааҕа Раиса Васильевна Федорова балыыһа кэлэктиибигэр «Фронтовые семьи якутян» кинигэни бэлэх уунна. Кинигэҕэ түөрт байыаннай дьиэ кэргэн (ол иһигэр бэйэтин дьиэ кэргэнин) туһунан очеркалар киирбиттэр. Ону сэргэ, кэргэнин туһунан бэйэтэ суруйбут “Любимый и родной” кинигэтин уонна икки мэтириэтин “Кыайыылаахтар” хаартыска быыстапкатыгар анаан бэлэхтээтэ. Быыстапка ыам ыйыгар Киров аатынан уулусса 34 дьиэтигэр баар поликлиника иккис этээһигэр холга арыллыаҕа.
Бэтэрээннэри кытары истиҥ көрсүһүү түмүгэр балыыһа үлэһиттэрэ байыаннай кэмнээҕи ырыалары толордулар уонна ыалдьыттарга өйдөбүнньүк бэлэхтэри туттардылар.
Надежда ЕГОРОВА, “Саха сирэ”, edersaas.ru cаайт.
Роза НИКОЛАЕВА хаартыскаҕа түһэриилэрэ.