Емельян Ярославскай аатынан Хотугу сир норуоттарын устуоруйатын уонна култууратын судаарыстыбаннай холбоһуктаах түмэлигэр «Благословенная и щедрая земля Татты» быыстапка арылынна.
edersaas.ru
Түмэл култуураҕа-үөрэххэ отделын сэбиэдиссэйэ Октябрина Максимова иһитиннэрбитинэн:
«Бу —– САССР 100 сылын чэрчитинэн өрөспүүбүлүкэ улуустарын түмэллэрин 29-с быыстапката. Быыстапкаҕа Таатта улууһун биэс түмэлиттэн: П.А.Ойуунускай аатынан судаарыстыбаннас түмэлиттэн, Ытык Күөллээҕи «Таатта» литературнай-уус-уран түмэл-заповеднигыттан, Чөркөөхтөөҕү устуоруйа-мемориальнай түмэлиттэн, Харбалаахтааҕы хартыына галереятыттан уонна Тааттатааҕы кыраайы үөрэтэр түмэлтэн 250-тэн тахса экспонат туруорулунна.Быыстапкаҕа кэлбит дьон Таатта улууһа төрүттэниитин уонна сайдыытын устуоруйатын, улуустан тахсыбыт биллиилээх дьон олоҕун уонна айар үлэтин билсиэхтэрэ».
Манна уопсастыбаннай уонна судаарыстыбаннай диэйэтэл, суруйааччы Былатыан Ойуунускай, саха литературатын төрүттээччи Алексей Кулаковскай-Өксөкүлээх Өлөксөй, драматург, прозаик, саха литературатын төрүттээччилэриттэн уонна классиктарыттан биирдэстэрэ Анемподист Софронов-Алампа, суруйааччы уонна драматург Николай Неустроев, саха бастакы норуодунай бэйиэтэ Серафим Кулачиков-Эллэй, норуодунай суруйааччылар Дмитрий Сивцев-Суорун Омоллоон, Николай Мординов-Амма Аччыгыйа, норуодунай худуоһунньук Иван Попов уо.д.а. тус маллара көрдөрүллэллэр.
Ону таһынан П.А.Ойуунускай аатынан Судаарыстыбаннай бириэмийэ лауреата, норуот маастара Борис Неустроев-Мандар Уус уонна кини үөрэнээччилэрин үлэлэрин билсиэххэ сөп.
Надежда ЕГОРОВА, «Саха сирэ», edersaas.ru
Ем.Ярославскай аатынан түмэл хаартыскалара