Ил Дархан быһа эпииригэр дьон-сэргэ Өлүөнэ эбэни туоруур муоста тутуутун туһунан ыйытыыны тумнубатылар.
edersaas.ru
«Өлүөнэ эбэни туоруур муоста тутуутун бырайыага олоххо киирэр кэрдииһигэр тиийдэ. Туох баар мөккүөр барыта ырытыыны ааста. Федеральнай бүддьүөттэн үбүлээһин боппуруостарын дойду салалтатын, бырабыыталыстыбаны уонна чааһынай партнердарбытын кытта тэҥҥэ быһаарыахпыт диэн эрэнэбин.
Билигин, биллэн турар, пандемия харгыстаан, үлэ хаамыыта бытаарда. Ол да буоллар концессионнай бырайыак бырайыактыыр-симиэтэлиир документацията оҥоһуллар уонна салгыы 2020 cыл ахсынньытыгар муоста тутуутун докумуонун бастакы түһүмэҕин эспэртиисэтэ кэлэр. Туох баар геодезическэй гидрометеорологическай, экология, тырааныспар ирдэбиллэрэ, чинчийиилэрэ ыытыллыбыттар. Билиҥҥи туругунан тутуу ыытыллар территориятын былааннааһын, сири атыылаһыы, түүлэһии, сорох сирдэри «Куорат ойуура» диэн статустан таһаарыы үлэтэ бара турар», — диэн Айсен Николаев эттэ.
Быһа эпииргэ Өлүөнэни туоруур муостаҕа аат биэриэххэ сөп дуо диэн, бэл, этии киирдэ.
Айсен Николаев: «Бэрт сэргэх этии. Ол эрээри быһа этэр табыллыбат. Тутулуннаҕына толкуйдуохпут», — диэн хоруйдаата.
Маны сэргэ муоста тутуута Уһук Илин 2035 сылга диэри социальнай-экэнэмиичэскэй сайдыытын Национальнай бырагырааматыгар киирбитэ олус үчүгэй диэн Ил Дархан түмүктээтэ.
Ирина Ханды, “Саха сирэ” хаһыат, edersaas.ru
Хаартыска: Интэриниэт ситимиттэн