Өлүөнэ өрүс муостата 2025 сылга тутуллуоҕа

Бөлөххө киир:

Ахсынньы 9 күнүгэр Ил Дархан Айсен Николаев Москва куоракка  “Арассыыйа –бүгүн”  диэн бэрэсидьиэн саалатыгар мультимедийнай пресс-кэмпириэнсийэни ыытта. Өлүөнэ өрүһү туоруур муоста Саха сиригэр эрэ буолбакка, дойду Хотугу-Илин өттүгэр эмиэ суолтаалаах  диэн  Айсен Николаев өссө чиҥэтэн эттэ.

— Аллаараа Бэстээҕи уонна киин куораты холбуур эрэ муоста диэн сыыһа өйдөбүл. Муоста тутулуннаҕына Саха сириттэн  Магадааҥҥа, кэлэр 15 сыл иһигэр Иркутскайга, салгыы Охотскай муораҕа  тиийэр массыына суола баар буолуоҕа.  2020 сыл муоста бырайыага оҥоһуллуннан, судаарыстыбаннай эспэртиизэни ааһыаҕа, 2021 сылтан тутуу үлэтэ саҕаланан, 2025 сылга муоста тутуллан, ону сэргэ киниэхэ киирии суоллара  оҥоһуллан бүтүөхтэрэ диэн эрэнэбин, — диир Ил Дархан.

Ил Дархан өрөспүүбүлүкэ бүддьүөтүгэр муоста  оруолун туһунан эмиэ кэпсээтэ. Ол курдук, хоту улуустарга таһаҕаһы таһыы ороскуота 4 миллиард солкуобайга дылы түһүөҕүн, сылы төгүрүччү суол баар буоллаҕына, тырааныспарынан сырыы 23 % -тан  83 % -ҥа диэри үрдүөҕүн бэлиэтээн эттэ.

Санатан кэпсээтэххэ,  сэтинньи 9 күнүгэр СӨ Ил Дархана Айсен Николаев муостаны тутууну Арассыыйа бүддьүөтүгэр киллэрэр туһунан көрдөһүү суругар дойду бэрэсидьиэнэ Владимир Путин «Олоххо киирэрэ уолдьаста» диэн резолюциялаан илии баттаабыта.  Салгыы Арассыыйа бырабыыталыстыбатыгар бу  боппуруоһу быһаарарга, этии киллэрэргэ соруйбута.  Өссө бэс ыйыгар буолбут “Быһа линияҕа” Владимир Путин, Өлүөнэ өрүһү туоруур муоста туһунан ыйытыыга, үөрэтэн баран, быһаарыахха наада диэн эппиэттээбитэ. Онтон атырдьах бу боппуруос от ыйыгар Уһук Илин сайдыытын национальнай бырагырааматыгар киирэн, балаҕан ыйыгар Арассыыйа сүрүн биэдэмистибэлэр сөбүлэҥнэрин ылбыта.

Барыллаан оҥоһуллубут бырайыагынан муоста тутуллар сыаната 63,7  миллиард солкуобай, ити иһигэр 9,5 миллиарды кэтэх инвестор уйунар  ороскуота, оттон сүрүн үп – 54,2 миллиард солкуобай капитальнай грант, ол иһигэр 47,8 миллиард – федеральнай, 6,4 миллиард  — эрэгийиэннээҕи бүддьүөт. НДС киллэрэн, муоста тутуутун уопсай үбэ 82,8 миллиард солкуобай, онон НДС төлөбүрүн кытта кэтэх инвестор уйунар үбэ барыта холбоон 28,6 миллиард солкуобай  буолар. Муоста үлэҕэ киирдэҕинэ, чэпчэки уйуктаах массыыналар босхо, онтон атын массыыналар 1 тыһыынча солкуобайтан 4 тыһыынчаҕа  диэри  төлөөн туорууллара былааннанар.

Ньургуйаана Иванова, «Саха сирэ» хаһыат, edersaas.ru

Хаартыска  СИА саайтыттан.

+1
0
+1
0
+1
0
+1
0
+1
0
+1
0
+1
0