Өлүөнэ муостатын «ВИС» уонна Ростех хампаанньалар консорциумнара тутар буолла
Өлүөнэ муостатын бырайыактааһыҥҥа, тутууга уонна эксплуатацияҕа «ВИС» уонна Ростех госкорпорация консорциума куонкурус түмүгүнэн талылынна. 2025 сылга муоста олоххо киирэрэ былааннанар.
«Муоста тутуутун бырайыагын быһаарсыы, туруорсуу уһун устуоруйалаах буолла. Урут хаста да тутуохтарын баҕарбыттара даҕаны, аныгы Арассыыйа кэмигэр эрэ тутуллар буолла. Дойду экэнэмиичэскэй инникитэ уонна социальнай-бэлитиичэскэй туруга бырайыагы олоххо киллэрэргэ кыах биэрдэ. Бэрэсидьиэн Владимир Путин өйөбүлэ тохсунньутааҕы анал этиитин кытта сөп түбэһэр — дьон туһугар кыһамньы уонна нэһилиэнньэ кыһалҕаларын туоратыы«,– диэтэ бырайыак салайааччыта, бырабыыталыстыба вице-премьера Кирилл Бычков.
Саха сиригэр дойду биир сүрүн өрүһүн туоратар муоста суох.
Дьокуускай эрэгийиэн киинэ эрээри, сыл устата быыстала суох сиринэн айанныыр суола-ииһэ суох. «Саҥа муоста улахан соруга — Саха сирин нэһилиэнньэтин 83 %-нын тохтоло суох суолунан хааччыйыаҕа. Эбиитин хоту оройуоннарга таһаҕаһы таһыы логистиката уларыйан, бүддьүөккэ 4 миллиард солкуобай хаалыаҕа. Тырааныспарка ороскуот кыччаан, олох хаачыстыбата тупсуоҕа, дохуот элбиэҕэ. Таһаҕаһы таһыы 6 мөлүйүөн туоннаҕа тиийэ элбиэҕэ, пассажир ахсаана сылга 8 мөлүйүөнү аһарар кыахтаныаҕа. Икки улахан хампаанньа бииргэ үлэлээн, ирдэбили барытын толоруохтара дии саныыбын», — диэн Кирилл Бычков эбэн этэр.
Өлүөнэ муостатын «ВИС» уонна Ростех госкорпорация консорциума олоххо киллэриэхтэрэ.
yakutia-daily.ru саайтан.