Бу күннэргэ Өлүөхүмэ оройуонугар судаарыстыбаннай былаас ситэриилээх уорганнарын отчуота ыытылынна. Бырабыыталыстыба бэрэссэдээтэлин солбуйааччы Ольга Балабкина салайааччылаах бөлөх үлэлээтэ.
Бастакы күн бырабыыталыстыба дэлэгээссийэтэ Солянка, Үҥкүр, Улахан Муҥку, Өлүөхүмэ, Киндигир, Тээнэ, Бэс Күөл, Токко, Саҥыйахтаах, Урицкай уонна Хоро сэлиэнньэлэргэ сырытта. Нөҥүө күнүгэр отчуоту Чапаево, Маача, Дьэлгэй, Дабаан, Троицкай, Заречнай, Даппарай, Нөөрүктээйи сэлиэнньэлэрэ, Абаҕа, Кээччи олохтоохторо иһиттилэр.
Миниистирдэр кэбиниэттэрин чилиэннэрэ ааспыт сыл сүрүн түмүктэрин туһунан кэпсээтилэр уонна чугастааҕы сылларга сүрүн соруктары туруордулар. Бырабыыталыстыба бэрэссэдээтэлин солбуйааччы дуоһунаһыгар аан бастаан отчуоттуур Ольга Балабкина отчуоту бэйэтэ сүрүннүүр хайысхатыттан – социальнай эйгэттэн саҕалаата.
2018 сыл сүрүн ситиһиилэрин быһыытынан вице-премьер нэһилиэнньэ ахсаана үүнүүтүн уонна Перинатальнай киин тутуллуутун түмүгэр кыра оҕо өлүүтүн аччааһынын бэлиэтээтэ. Элбэх оҕолоох ыал ахсаана элбээтэ. Маннык ахсааҥҥа үстэн элбэх оҕолоохтор киирэллэр.
Демография бэлиитикэтэ салҕаныаҕа. Маны аҕыйах хонуктааҕыта илии баттаммыт Айсен Николаев төрөөһүнү өйүүргэ туһуламмыт эбии миэрэлэр тустарынан ыйааҕа да бигэргэтэр.
Өлүөхүмэ оройуонун туһунан этэригэр, бырабыыталыстыба бэрэссэдээтэлин солбуйааччы доруобуйа харыстабылыгар хамсааһын тахсыбытын бэлиэтээтэ. Быйыл оройуон киин балыыһатын саҥа кылаабынай бырааһа кэккэ кыһалҕалары быһаарарга үлэлэстэ – «узкай» исписэлиистэри аҕалан, олорор дьиэнэн хааччыйыы, күнүскү стационардарга эбии куойкалары туруоруу, сыстыганнаах ыарыылары эмтиир отделениены саҥа дьиэҕэ көһөрүү, компьютернай томограбынан хааччыллыы. Оттон реанимация отделениетын арыйыы элбэх дьон олоҕун быыһаабыт.
Өлүөхүмэ техникумугар салгыы бөдөҥ хампаанньаларга үлэлэтэр сыаллаах олохтоох каадырдары бырамыысыланнаска бэлэмниир үлэ саҕаланна. Онон идэтийбит анал үөрэхтээһиҥҥэ улахан болҕомто ууруллуоҕа.
Үөһээ Бүлүүнү, Эдьигээни, Нерюнгрины, Уус Ньараны, Маҕаны, Полярнайы сэргэ Өлүөхүмэҕэ 2019 сылга аэропуорду саҥардыы саҕаланыаҕа.
Жатайдааҕы судоверфи тутуу саҕаланыыта уу тырааныспарынан туһанар Өлүөхүмэ уонна атын улуустар сайдыыларыгар төһүү буолуоҕа.
Ольга Балабкина өрөспүүбүлүкэ кэккэ оройуоннарыгар “Куорат табыгастаах эйгэтин тэрийии” федеральнай бырагырааманы олоххо киллэриигэ суолта бэриллиэхтээҕин бэлиэтээтэ. Муниципалитет уонна олохтоохтор көмөлөрүнэн бу бырайыак чэрчитинэн Өлүөхүмэҕэ “Спасское селение” историческай паарканы чөлүгэр түһэриигэ 30 мөл солкуобай көрүлүннэ.
Мунньах сүнньүнэн олохтоохтор санааларын аһаҕастык этиннилэр.
ysia.ru саайтан Женни Стрюкова тылбаастаата.