Режиссер Тимур Бекмамбетов атырдьах ыйын бүтүүтэ Дьокуускайга кэлэ сылдьыбытын кэпсээбиппит. Кини айар үлэтигэр Саха сирэ сыһыаннаах. Холобур, бу «Елки» киинэтин 1 сиэрийэтин 1 чааһыгар сорох түгэннэрэ Саха сиригэр уһуллубуттара. Итиэннэ Светлаков оонньуур дьоруойа Женя Саха сириттэн төрүттээх. Аны «Елки-6» киинэтигэр, Саҥа Дьыл саҕана харчылаһаары Тымныы Оҕонньор буолбут киргиз гастарбайтера Мурат оруолун Саха тыйаатырын биллэр-көстөр артыыһа Геннадий Турантаев оонньуурун эмиэ көрбүт буолуохтааххыт. Оттон быйылгы Саҥа Дьыллааҕы «Елки» киинэ 7-с чааһа түмүктүүр сиэрийэнэн буолуоҕа уонна Арассыыйа киинэ тыйаатырдарыгар ахсынньы 27 күнүгэр тахсыаҕа.
Онон, бу күн «Елки Последние» – биһиги иэнэ-куйаара биллибэт дойдубут боростуой дьонун устуоруйаларын кэпсиир саҥа дьыллааҕы дьиэ кэргэн блокбастерын, онно киинэни оҥорооччулар финалга тугу бэлэмнээбиттэрин, көрүөхпүт.
Кинилэр эрэннэрэллэринэн, «Елки Последние» саамай үтүө, истиҥ иэйиилээх уонна алыптаах хартыынанан буолуоҕа, тоҕо диэтэххэ, дьоруойдар көрөөччүлэрин кытта быраһаайдаһыахтара. Киинэ-альманахха биэс Саҥа Дьыллааҕы устуоруйа киириэҕэ. Ол курдук, Тимур Бекмамбетов «Сосны» киинэтигэр миллениал (Данил Вахрушев) бэйэтин брутальнай маачаха аҕатыгар дьээдьэ Юраҕа (Дмитрий Нагиев) кэргэн кэпсэтэригэр көмөлөһүөҕэ.
«Братья» түһүмэххэ арахсыспат доҕордуулар Боря (Иван Ургант) уонна Женя (Сергей Светлаков) аны арахсар аатыгар түһүөхтэрэ, тоҕо диэтэххэ, Женя Дьокуускайга төннөргө санаммыт. Бастакы «Елкалар» дьоруойдара – хайыһардьыт (Александр Домогаров) уонна сноубордист (Александр Головин), Егор Баранов «Ресторан быстрого знакомства» новеллатыгар, биир кэрэ кыыс мичээрин туһугар куораты бүтүннүү өрө сүргэйэргэ бэлэм буолуохтара…
Анна Пармас «Вокзал на троих» киинэтигэр, бэйэтин дьолун – столицаттан сылдьар актер Комаровскайы (Марк Богатырев) эккирэтэн барбыт Воронежтан сылдьар боростуой кыыс (Екатерина Агеева) устуоруйата кэпсэниэҕэ. Оттон Александр Котт «Вредный дедушка» новеллатыгар Хаарчаана (Юлия Александрова), наар буугунуу, мөҕүттэ сылдьар, ол эрээри олус соҕотохсуйбут эһээтин (Юрий Кузнецов) быыһыы барыаҕа.., диэн, киинэ пресс-сулууспатыгар сигэнэн, РИА Новости иһитиннэрэр.
«Куруутун буоларын курдук, бары новеллалар, өрдөөҕү үгэстэри харыстаан илдьэ сылдьыы – бу бырааһынньыктыы настарыанньа биир, олус суолталаах атрибута, диэн Константин Хабенскай каадыры таһынааҕы куолаһынан ситимнэһэллэр», — диэн бэлиэтэнэр матырыйаалга.
Дьон Саҥа Дьылга туох эрэ дьиктини, алыптааҕы син-биир кэтэһэр. Онон бу — көрөөччүлэрбит баҕа санааларын толоруу буолар, диир Тимур Бекмамбетов.
Хаартыска Интэриниэттэн.
Бэлэмнээтэ Татьяна Маркова, edersaas.ru.