Уопсастыба

Елизавета Алексеева Арассыыйатааҕы куонкуруска кыайыылаах буолла

Быйыл «Мин дойдум — мин Арассыыйам»(«Моя страна – моя Россия») бүтүн сойуустааҕы куонкурус  18-с төгүлүн ыытылынна.
Бэйэлэрин бырайыактарын  дойду эригийэннэриттэн уонна 24 омук сириттэн 90 тыһыынчаттан тахса кыттааччы көмүскээтэ. Куонкурус кыайыылаахтарынан 250 киһи, (былырыыҥҥытааҕар икки төгүл элбэх) буолла.

СӨ Аҕа баһылыгын уонна Бырабыыталыстыбатын пресс-сулууспата иһитиннэрбитинэн, Саха сириттэн өрөспүүбүлүкэтээҕи лиссиэй-интэринээт үөрэнээччитэ Елизавета Алексеева «Кыайыы волонтердара» бырайыагы көмүскээн, үрүҥ көмүс мэтээлинэн бэлиэтэннэ. Кыайыылаах кэпсээбитинэн, Аҕа дойду Улуу сэриитигэр дойдуларын көмүскэлин туһугар олохторун толук уурбут байыастар ийэлэрин быһаарыы, кинилэр ааттарын булуу, ирдэһии бырайыага элбэх киһини интэриэһиргэппит.

—  Элбэх ыал олоҕун дьылҕатын биллибит. Бырайыакка билигин 70 киһи үлэлэһэр: оҕо уопсастыбаннай тэрилтэлэрин актыбыыстара, учууталлар, төрөппүттэр, суруналыыстар, түмэл уонна бибилэтиэкэ үлэһиттэрэ, — диэн кэпсиир Елизавета Алексеева.

— Биһиги оҕолорбут араас сонун сүүрээннэри олоххо киллэрэр бырайыактара дойду уонна норуоттар икки ардыларынааҕы куонкурустарга өрүү биһирэбили ылаллар. «Көр, бу Арассыыйа!» («Смотри, это Россия!») бырайыакпыт бүтүн сойуустааҕы статустанна. Биһиги ийэ дойдуларыгар бэриниилээх ыччаттары иитэр бырайыактарбыт Арассыыйабытыгар тапталбыт туоһута, — диэн бэлиттиир Ил Дархан Айсен Николаев.

«Мин дойдум — мин Арассыыйам»(«Моя страна – моя Россия») бүтүн сойуустааҕы куонкурус  «Үөрэх» национальнай бырайыак чэрчитинэн ыытыллар. Арассыыйаҕа Наука уонна технология сылын былаанын олоххо киллэриигэ суолталаах тэрээһин быһыытынан киирбитэ.

 

Елена ПОТОЦКАЯ, “Саха сирэ” хаһыат, edersaas.ru

Хаартыска: СӨ Аҕа баһылыгын уонна Бырабыыталыстыбатын пресс-сулууспата

0
0
Telegram @edersaas20