Уопсастыба

Элгээйи үбүлүөйдээх ыһыаҕа куйаар ситиминэн ыытылынна

Элгээйигэ быйыл  үбүлүөйдээх ыһыахпыт куйаар ситиминэн ыытылынна. Дьоммут-сэргэбит «Элгээйи ТВ» нөҥүө тэрээһини барытын көрө олордулар. Ол курдук ытык күн сарсыардаттан алгыс түстэнэн ыһыах кэһиитэ кырдьаҕастарбытыгар түҥэтилиннэ.

 

Нэһилиэк киин уулуссалара былааҕынан киэргэнэн, рупорынан ырыа-тойук эҥсиллэн ыһыаҕы санатта. Бастакы күн 1998 сыллаах оскуоланы бүтэрээччилэр «Тап+тал» түһүлгэлэрэ арыллан үөрүү үксээтэ, атын дьоммутугар ыҥырыы оҥоһулунна. Иккис күн Елена Гурьева, Александр Миронов көҕүлээһиннэринэн, атыы-эргиэн үлэһиттэрин бачыымнарынан оҥоһуллубут Элгээйитээҕи сельпо 90 сылыгар анаммыт өйдөбүнньүк арылынна. Манна кырдьаҕастыын, эдэрдиин кэлэн уруккуну ахтыахпыт, дьоммутугар махтаныахпыт, сельпо онобулун билиэхпит дэһэн үөрэ-көтө санааа үллэстиитэ тэрилиннэ, кымыһынан, алаадьынан күндүлэннибит.

Салгыы эбиэт кэннэ «Тыа сирин биир кэлимсэ сайыннарыы» тосхолунан Искусство оскуолатын аттынааҕы Дьиэ кэргэн искибиэрэ саҥардыллыбыта арылынна. Онтон киэһэ Прокопий Егоров-Уран ыйыытынан-кэрдиитинэн тутуллубут саха балаҕана аанын аста! Ону таһынан «Элгээйим бэлэҕэ» диэн сүүйүүлээх лотерея оонньонон сүрүн бириис массыына Түбэй Дьаархаҥҥа Жанна Валерьевна диэн Далбар Хотуҥҥа соһуччу, дьоллоох түгэн тосхойон бэлэх буолла. Дьэ, бу курдук икки күн устата төрөөбүт дойдум үөрүүнэн өрөгөйдөннө, сайдыынан кэрэһилэннэ! Үбүлүөйүнэн дойдум дьоно!

 Мария Кобельянова-Тускулаана, Сунтаар

0
0