2020 сылга «ЭльгаУголь» хампаанньа 7 мөлүйүөн туонна таас чоҕу хостообута. Үүммүт сылга 18 мөлүйүөн туоннаны хостуур былааннаах.
Ил Дархан Айсен Николаев бэҕэһээ, олунньу 13 күнүгэр, «ЭльгаУголь» ааспыт сыллааҕы үлэтин түмүгүнэн үп-хаһаайыстыбаннай туругун көрдө уонна 2021 сыллааҕы үлэтин былааннарын кытары билистэ.
Санатан эттэххэ, 2020 сыллаахха «Мечел» «ЭльгаУголь» хампаанньаны Альберт Авдолян «А-Проперти» хампаанньатыгар атыылаабытар. Предприятие Элгэтээҕи таас чохтоох сиргэ үлэлиир. Бу таас чохтоох сир саппааһа 2,2 млрд туоннанан ааҕыллар. Хостооһун үлэтэ 2011 сылтан саҕаламмыта.
Айсен Николаев Элгэтээҕи бырайыак бүгүн Саха сирин экэниэмикэтигэр cүрүн суолталааҕын бэлиэтээн эттэ.
«Биһиги бу бырайыак дойду үрдүнэн баараҕай суолталаах буолуохтаах диэн уруккуттан этэр этибит. Ол гынан баран урукку бас билээччи туох баар кыаҕын туһанан үлэлии сатаабыта да, бырайыак улаханы ситиспэтэҕэ. Бас билээччи уларыйбытын кэннэ, балаһыанньа чыҥха уларыйда. 2021 сылга 18 мөл. туонна таас чоҕу хостооһун былаана турар», — диэн Айсен Сергеевич эбэн эттэ.
2018 сылтан «ЭльгаУголь» «Олохтоох каадырдары — бырамыысыланнаска» бырайыакка кыттар. Бэдэрээтчиттэри аахсыбакка туран, күн бүгүн предприятиеҕа 576 киһи үлэлиир. Мантан 262-тэ олохтоох дьон.
СӨ Ил Дарханын уонна бырабыыталыстыбатын пресс-сулууспата