Елена Малинникова: «Балаһыанньа уустук, ол эрээри олус кутталлаах диир сатаммат»
Арассыыйа Доруобуйа харыстабылын министиэристибитэтин ыстааты таһынан кылаабынай инфекционист бырааһа Елена Малинникова муус устар 30 күнүгэр Саха Өрөспүүбүлүкэтигэр кэллэ.
Елена Юрьевна кылгас брифиҥҥэ дойдуга уонна өрөспүүбүлүкэҕэ ыарыы тарҕаныытын туругун туһунан маннык эттэ:
— Биһиги дойдубутугар коронавирус ыарыы балаһыанньата уустук, тыҥааһыннаах эрээри, олус кутталлаах диир сатаммат. Мин эрэгийиэннэргэ айаным былааннаммыт тэрээһин буолар, ыарыыны кытта охсуһуу үлэтин салайыы, былааннааһын үлэлэрин көрө кэллим.
Саха сирэ — улахан суолталаах уонна киэҥ эрэгийиэн. Киэҥ сиринэн тайаан сытар буолан, доруобуйаны харыстааһын өҥөлөрүн оҥоруу уустуктары үөскэтэр, ол иһин туспа ньымалар туһанылаллар. Сорох улуустарга эмтээһин өҥөтүн оҥорууга тэрээһин өттүгэр уустуктар үөскээтилэр.
Миэхэ билигин өрөспүүбүлүкэҕэ короновирус инфекциятын утары үлэлээһиҥҥэ ылыллыбыт былааны көрдөрдүлэр. Мин санаабар, былаан үчүгэйдик үлэлиир чинчилээх. Бу былаан ыарыыны хааччахтыырга туһалаах буоларыгар эрэнэбин.
Өрөспүүбүлүкэ баһылыгын уонна дьаһалтатын кытта ыыппыт мунньахпыт түмүгүнэн көрдөххө, коронавируһу эмтээһин өҥөтүн оҥоруу чааһыгар өссө күүстээх дьайыылаах, боппуруоһу бары өттүттэн хабар гына былааны кэҥэтиэхтээхпит көстөр.
Мин сыалбынан доруобуйаны харыстааһын эйгэтигэр үлэлиир дьон төһө бэлэмнээхтэрин, балыыһалар дьону эбии ылар кыахтарын, эмп-томп, эмтиир тэриллэр төһө тиийэллэрин бэрэбиэркэлээһин буолар.
Егор Карпов, edersaas.ru
СИА хаартыската.