Елена Голомарева: «Саха сирин аҕыс улууһун Арассыыйа Арктикатааҕы зонатыгар киллэрии – устуоруйаҕа бэлиэ түгэн»
![](https://edersaas.ru/wp-content/uploads/2019/05/eaed05b3-7d01-4a78-8ffc-d7953eef2086_0.jpg)
Саха сирин дьокутаата, Ил Түмэн аҕыйах ахсааннаах төрүт норуоттарын уонна Арктика дьыалаларыгар сис кэмитиэтин бэрэссэдээтэлэ, “Биир ньыгыл Арассыыйа” баартыйа чилиэнэ Елена Голомарева судаарыстыба баһылыгын бу ыйааҕын устуоруйаҕа бэлиэ түгэнинэн сыаналыыр.
“Өр кэтэспит сонуммутунан эҕэрдэлиибин! Дьэ, аны бу статус Арктика сайдыытыгар үлэлээтин!”, — диэн Елена Голомарева бэлиэтээтэ.
Кини 2008 сыллаахха Арктика зонатын тирэхтээх сайдыытын Стратегията, Арктика зонатын сайдыытын бырагыраамата ылыныллыбытын санатта.
Елена Голомарева бу боппуруоһу бастакынан Саха сирин баһылыга Егор Борисов туруорсубутун бэлиэтээтэ. Сүҥкэн үлэни бу улуустары киллэриини научнай өттүнэн ырыппыт М.К.Аммосов аатынан Хотугулуу-Илиҥҥи федеральнай университет ректора Евгения Михайлова, Анатолий Алексеев салалталаах РНА Гуманитарнай чинчийиилэргэ института, Игорь Колодезников салалталаах Саха сирин Наукаларын академията ыыппыттара.
Кини этэринэн, Федерация Сэбиэтигэр түмүктүүр матырыйааллары Егор Борисов киллэрбитэ. Вячеслав Штыров эмиэ үгүс үлэни ыыппыта. Арассыыйа экэниэмикэҕэ министиэристибэтин кытта СӨ Арктика дьыалаларыгар Госкэмитиэтэ докумуоннары бииргэ бэлэмнээбитэ.
“Боппуруоһу өрөспүүбүлүкэ сенатордара Александр Акимов, Вячеслав Штыров, кэлин – Егор Борисов, Судаарыстыбаннай Дуума дьокутааттара Галина Данчикова, Федот Тумусов туруорсубуттара. Араас форумнарга биллиилээх уопсастыбаннай деятеллэр Ульяна Винокурова, Зоя Корнилова, Альбина Поисеева тыл эппиттэрэ”, — диир Елена Голомарева.
Кини этэринэн, Александр Жирков бэрэссэдээтэллээх бэһис ыҥырыылаах Судаарыстыбаннай Мунньах (Ил Түмэн) улахан үлэни ыыппыта. Билиҥҥи ыҥырыылаах депутаттар куорпустарын баһылыга Петр Гоголев, вице-спикер Виктор Губарев федеральнай таһымҥа боппуруоһу эмиэ өрүү көтөҕөллөрө.
Дьокутаат Арктика олохтоохторун ааттарыттан Ил Дархан Айсен Николаевка уустук, оннуттан хамсыыр кыаҕа суох буолбут курдук боппуруоһу дьаныардаахтык турууласпытын иһин махтал тылларын этэр.
“Биһиги дойду бэрэсидьиэнэ Владимир Владимирович Путиҥҥа дириҥник махтанабыт. Арктика судаарыстыба ураты бэлиитикэтигэр наадыйар. Үтүө өттүгэр үгүс уларыйыылары күүтэбит”,-— диэн бэлиэтээтэ Елена Голомарева.
Ил Түмэн пресс-сулууспата