Елена Борисова: “Балыыһалар сабыллыбаттар, төттөрүтүн, атын эмтиир тэрилтэлэри арыйабыт”
Бүгүн, атырдьах ыйын 20 күнүгэр, СӨ доруобуйа харыстабылын миниистирэ Елена Борисова суруналыыстарга пресс-кэмпириэнсийэни ыытта.
edersaas.ru
Елена Борисова суруналыыстары кытары көрсүһүүгэ СӨ Доруобуйа харыстабылын министиэристибэтин 8 ыйдаах үлэтин түмүктэрин уонна сыл бүтүөр диэри былааннары билиһиннэрдэ. Ол кэнниттэн үгэс буолбут кэмпириэнсийэлэртэн арыый атыннык ыытар баҕалааҕын биллэрэн туран, тута суруналыыстар ыйытыыларыгар хоруйдаата. Ону сэргэ, кэмпириэнсийэ видеоҕа уһуллан, тута социальнай ситимнэргэ тарҕанна.
Миниистир ханнык баҕарар кириитикэҕэ эппиэттииргэ уонна аһаҕас кэпсэтиигэ киирэргэ куруук бэлэмин тоһоҕолоон бэлиэтээтэ.
Арассыыйаҕа билигин сүрүн соругунан доруобуйа харыстабылыгар Национальнай бырайыагы олоххо киллэрии буолар. Ол иһигэр — медицинскэй хаачыстыбаны тупсарыы, каадырынан хааччыллыы, оҕо өлүүтүн аҕыйатыы, искэн уонна сүрэх-тымыр ыарыыларыттан өлүүнү аччатыы. Нэһилиэнньэни саамай долгутар боппуруоһунан биэлсэр-акушер пууннарын (ФАП), учаастактааҕы балыыһалары сарбыйыы, сабыы буоларын бары билэ-көрө сылдьабыт. Ол туһунан ыйытыыга миниистир Елена Борисова маннык хоруйдаата:
“Биһиги маны сарбыйыы диэбэппит. Биһиги билигин медицинскэй көмөнү оҥоруу хаачыстыбатын тупсарыы туһунан толкуйдуубут. Доруобуйа харыстабылын салаата урусхалланна диэн өйдөөмөҥ. Доруобуйа харыстабыла баарын курдук баар. Арай, нормативнай базалар, доруобуйа харыстабылыгар сыһыан уларыйаллар. Биһиги ыйаахтарга, стандартарга, бирикээстэргэ олоҕуран үлэлиибит. Федеральнай сокуону көҕүлээһиннэргэ уонна икки сүрүн сокуоҥҥа суукканы быһа эмтиир балыыһалар, күнүскү балыыһалар уо.д.а. тустарынан чопчу ыйыллар. Бу федеральнай сокуоннарга этиллэринэн, хомойуох иһин, 2012 сылтан ыла үгүс эрэгийиэннэр сокуон этиилэригэр сөп түбэспэккэ олороллор. Чуолаан, учаастактааҕы балыыһалар. Билигин сокуон тылынан, “учаастактааҕы балыыһа” диэн суох. Ол иһин, биһиги эмиэ сокуоҥҥа сөп түбэһиэхтээхпит. Ол эбэтэр нэһилиэнньэлээх оройуоннарга биир да биэлсэр пуунун, балыыһаны саппаппыт, төттөрүтүн, хаһан да медицинскэй көмө оҥоһуллубатах оройуоннарыгар саҥа эмтиир тэрилтэлэри арыйабыт. Иккиһинэн, хаачыстыбаны көрөбүт. Социальнай ыйытыылартан көрдөххө, нэһилиэнньэ медицинскэй көмө хаачыстыбатыттан улаханнык астыммат. Ол аата, уларытар, уларыйар кэм кэллэ…”.
Кэмпэриэнсийэҕэ кэпсэтиини “Саха сирэ” хаһыат атырдьах ыйын 29 күнүгэр сиһилии бэчээттиэхпит.
Надежда ЕГОРОВА, “Саха сирэ”, edersaas.ru