Бэс ыйын 15 күнүгэр Суһал ыстаап брифинин СӨ доруобуйа харыстабылын миниистирэ Елена Борисова ыытта. Хамсык ааспыт күннээҕи туругун туоһулуур сыыпараларын тэҥэ, коронавируһу утары быһыыны ыытыы хампаанньатын тэтимин кэпсээтэ.
Бу күҥҥэ Саха сиригэр 208 109 вакцина кэлбититтэн, 185 420 киһи быһыы маҥнайгы түһүмэҕин ааспыт, иккистэрин 137 216 киһи ылбыт. Ити аата кэлбит вакцина 89% дьоҥҥо бэриллибит.
Миниистир кэнники күннэргэ вакцинация тэтимэ лаппа намтаабытын бэлиэтээн эттэ.
— Ааспыт өрөбүллэргэ вакцина маҥнайгы түһүмэҕин 150 эрэ киһи ылбыт, бу үлэ соччото суоҕун туоһулуур, — диэтэ.
Елена Борисова вакцинация коронавирус дьаҥа тарҕаныытын хааччахтыырга сүрүн ньыма буоларын туһунан санатта.
«Саха сирэ» хаһыат, edersaas.ru
Хаартыска sakha.gov.ru