Бүгүн сарсыарда 11 чааска доруобуйа харыстабылын миниистирэ Елена Борисова коронавирус туругун туһунан ыыппыт брифинигэр сэрэтэр быһыыны ыларга ыҥырда.
edersaas.ru
Ааспыт сууккаҕа өрөспүүбүлүкэ үрдүнэн 47 киһи дьаҥҥа хаптарбыт. Ыалдьыбыт дьонтон 23 киһи киин куорат, түөрт киһи Мииринэй, үстүү киһи Алдан, Ньурба, Сунтаар, Мэҥэ Хаҥалас улуустарын олохтоохторо буолаллар, Бүлүү, Үөһээ Бүлүү, Горнай, Өлөөн, Хаҥалас, Томпо уонна Чурапчы улуустарыгар биирдии киһи ыалдьыбыт. Дьаҥ туруоҕуттан 6 938 киһи ыалдьыбыт (78 %-нара Дьокуускай куорат олохтоохторо), 5744 киһи үтүөрбүт. Билигин улуустарга кэтээн көрүүгэ сылдьар 13 000 оҕоттон бу нэдиэлэҕэ 10 оҕо ыалдьыбыта биллибит. Күҥҥэ 2 330 чинчийии оҥоһуллар, дьаҥ саҕаланыаҕыттан барыта 350 000 анаалыс оҥоһуллан, бэрэбиэркэлэммит.
– Бүгүҥҥү күҥҥэ сүрүн сорукпут үөрэх дьылыгар бэлэмнэнии буолар, – диэтэ Елена Афраимовна. – Оскуолаларга уонна оҕо саадтарыгар саҥа киирэр оҕолортон медсправканы ирдээбэппит. Эмп үлэһиттэрэ эмтиир-сэрэтэр үлэ тиһигин тэрийиигэ бырайыак бэлэмнээтилэр, ол быһыытынан кэлэр нэдиэлэттэн оҕо саадтарыгар оҕолору уочаратынан ыҥыран, медицинскэй көрүү ыытыллыаҕа, оттон маҥнайгы кылаас үөрэнээччилэригэр балаҕан ыйын 1 күнүттэн саҕаланыаҕа. Ити курдук, миэстэтигэр медицинскэй көрүүгэ сыл устата оҕо барыта хабыллыаҕа. Ону таһынан эмтиир-сэрэтэр үлэ сүрүн түһүмэҕэ – быһыы биэриитэ (вакцинация) буолар. Бу нэдиэлэҕэ быһыы эмп үлэһиттэригэр уонна кэккэ оҕо бөлөхтөрүгэр оҥоһулунна. Атырдьах ыйын 28 күнүттэн маассабай вакцинация саҕаланыаҕа. Өрөспүүбүлүкэ олохтоохторун быһыыны ыларгытыгар ыҥырабыт. Бу булгуччулаах дьаһал да буолбатар, быһыыны ылыы ыарыы тарҕаныытын сэрэтэр уонна бохсор үлэ биир сүрүн көрүҥэ буоларын умнубаккытыгар сүбэлиибин. Бэйэҕитин да харыстаныҥ, дьону да харыстааҥ.
Раиса Сибирякова, «Саха сирэ» edersaas.ru