Доруобуйа

Елена Борисова: ордук эдэр дьон ыалдьар буоллулар

Ааспыт биир хонукка өрөспүүбүлүкэҕэ 90 киһи коронавирус дьаҥар сутуллубута быһаарыллыбыт. Бу туһунан бүгүн, бэс ыйын 16 күнүгэр, СӨ Доруобуйа харыстабылын миниистирэ Елена Борисова брифиҥҥэ эттэ.

Доруобуйа харыстабылын миниистирэ этэринэн, хантаактаах дьону быһаарыы үлэлэрэ, ону таһынан, амбулаторияларга эми-тому босхо түҥэтии салҕаналлар. Кини вакцинация боппуруоһугар тохтоон, бэҕэһээ РФ Бырабыыталыстыбатын вице-премьеригэр Татьяна Голиковаҕа суһал ыстаапка СӨ Ил Дархана Айсен Николаев «ЭпиВакКорона» вакцина дуозатын эбии 50 тыһ.тахсаны ыытарга эппитин иһитиннэрдэ. «РФ Доруобуйа харыстабылын министиэристибэтэ бу сайаапканы көрөр. Чугастааҕы күннэргэ вакцина өрөспүүбүлүкэҕэ тиэрдиллэригэр эрэнэбит», — диэбит тустаах министиэристибэ салайааччыта.
Бэс ыйын 16 күнүнээҕи иһитиннэриинэн, коронавируһу утары туруорарга барыта 208 109 дуоза вакцина аҕалыллыбыт. Бастакы вакциналарын 186 625 киһи, ол иһигэр 60 саастарын ааспыт 42 457 киһи ылбыт. Иккистэрин 140 170 киһи, ол иһигэр 60 саастарын ааспыт 33 890 киһи ылбыта бэлиэтэнэр. Билиҥҥи туругунан, өрөспүүбүлүкэҕэ аҕалыллыбыт вакцина уопсай ахсааныттан 89,6 % туһаныллыбыт.
«Бу куһаҕана суох көрдөрүү. Ол гынан баран, нэһилиэнньҕэ улахан дьон 70 % ыларын ситиһэргэ, үлэни күүһүрдэр ирдэнэр», — диир миниистир итиэннэ быһыыны биэрэр пууннар бары мэдиссиинэ тэрилтэлэригэр сэттэ күн устатыгар үлэлииллэрин санатта. Быһыыны ыларга Госуслуги нөҥүө, медицина тэрилтэтин регистратуратыгар эбэтэр «Облачная поликлиника» сыһыарыынан суруйтарыахха сөп.
Елена Борисова этэринэн, билигин үксүн доруобуйаларыгар улахан болҕомтолорун уурбат эдэр дьон ыалдьар буолбуттар. Үксүлэрэ медицина тэрилтэлэригэр туруктара мөлтөөн баран кэлэллэрин бэлиэтээтэ. «Нэһилиэнньэҕэ ОРВИ, тымныйыы бастакы сибикилэрэ билиннилэр да,  диагноһы туруортаран тута эмтэммитинэн барар курдук, хайаан да бырааска көрдөрүҥ диэн сүбэлиибин,» — диэтэ миниистир.
0
0