Өрөспүүбүлүкэҕэ эпидемиологическай балаһыанньа уустугуран иһэр, коронавируснай инфекциянан ыалдьыы эбиллэр диэн доруобуйа харыстабылын миниистирэ Елена Борисова брифинг кэмигэр иһитиннэрдэ.
Билигин сүрүн болҕомто быһыыны биэрэргэ ууруллар. Өрөспүүбүлүкэҕэ барыта 114,4 тыһыынча устуука “ЭпиВакКорона” уонна “Спутник” вакциналар кэлбиттэрэ. Билиҥҥи туругунан, бастакы укуолу 106 тыһыынча киһи, иккис укуолун 60,4 тыһыынча киһи ыллылар.
Бырааһынньыктааҕы өрөбүл күннэргэ мэдиссиинэ тэрилтэлэрэ бары үлэлииллэр. Кыраапыктара саайтарга, социальнай ситимнэргэ тахсыбыта. Ону таһынан, дьиэҕэ ыҥырарга эбии биригээдэлэр тэрилиннилэр. Суһал лиинийэлэр күнүстэри-түүннэри үлэлииллэр.
Миниистир оҕолор, ыччаттар коронавируһунан ыалдьыылара элбээбитин бэлиэтээтэ. Холобур, былырыын үксэ сааһырбыт дьон ыалдьаллар этэ. Онон Маай бырааһынньыктарыгар элбэх киһилээх сирдэргэ, тэрээһиннэргэ сылдьыбакка, бэйэни харыстанар миэрэлэри тутуһарга ыҥырда.
Ангелина Васильева, “Саха сирэ” хаһыат, edersaas.ru