Елена Борисова: «Биэлсэр-акушер пууннарын оннунан хаалларарга салгыы үлэлэһэбит»
Дойду баһылыга Владимир Путин Федеральнай Мунньахха Анал этиитигэр доруобуйа харыстабылын боппуруостарыгар сүрүн болҕомтотун уурда.
edersaas.ru
Владимир Путин киһи олоҕун орто уһуна 73 сааска тиийбитэ (2000 сылы кытта тэҥнээтэххэ, 8 сылынан элбэх) Арассыыйаҕа былырыын аан бастаан бэлиэтэммитин санатта. “Бу — дойдуга социальнай, экэнэмиичэскэй уларыйыылар, маассабай спорт сайдыытын, чөл олох сыаннастарын инники күөҥҥэ тутуу түмүктэрэ. Биллэн турар, манна суолталаах кылааты доруобуйа харыстабылын систиэмэтэ, чуолаан үрдүк технологиялаах медицинскэй көмө, ийэ уонна оҕо доруобуйатын харыстабылын бырагыраамалара, киллэрдилэр.
Оҕо өлүүтэ аҕыйааһынын көрдөрүүтэ Европа сорох дойдуларынааҕар үчүгэй… Доруобуйа харыстабылыгар ситиһиилэрбит өскөтүн биһиги тустаах соруктары туруорар буоллахпытына, үчүгэй түмүктэри ылыахпытын сөбүн көрдөрөллөр. Ол да буоллар, дьон-сэргэ доруобуйа харыстабылын сыыппараларынан буолбакка, көрдөрүүлэринэн сыаналыыр”, — диэн билигин улахан күүс доруобуйа харыстабылын бастакы сүһүөх звенотугар ууруллуохтааҕын санатта. Чуолаан, бу түһүмэххэ уустук кыһалҕалар бааллар.
“Биһиги быйыл биэлсэр-акушер пууннарын систиэмэтин тэнитиини толору түмүктүөхтээхпит. Ол гынан баран, ФАП кыһалҕалара бары быһаарыллаллар диир кыахпыт суох. Дьоҥҥо сөптөөх көмөнү оҥорор, аныгы тэрили уонна суһал интэриниэти туһанар кыах испилэсиистэргэ баар буолуохтаах… От ыйын 1 күнүттэн доруобуйа харыстабылын бастакы сүһүөх звенотун модернизациялааһын бырагыраамата үлэлиэҕэ. Дойду бары эрэгийиэннэригэр поликлиникалары, оройуоннааҕы балыыһалары, суһал көмө ыстаансыйаларын саҥа тиэхиньикэлэринэн сэбилиир наада буолуоҕа. Маны быһаарарга биһиги эбии 550 миллиарды биэрдибит”, — диэтэ дойду баһылыга Владимир Путин.
СӨ доруобуйа харыстабылын миниистирэ Елена Борисова маныаха:
“Биһиги бастакы сүһүөх звенону оннунан хаалларары ситиспиппит уонна биэлсэр-акушер пууннарын, быраас амбулаторияларын эмиэ оннунан хаалларарга үлэлэһэбит. Онуоха билигин дьарыктана сылдьар модернизациябыт быйыл от ыйын 1 күнүгэр бигэргэтиллиэҕэ”, — диэн, дойду баһылыгын Туһаайыытыгар санаатын үллэһиннэ.
Надежда ЕГОРОВА, «Саха сирэ”, edersaas.ru