IT-паарка резиденэ, «Иһитиннэрэр-тэхиньиичэскэй киин» ХЭТ тыа хаһаайыстыбатын сүөһүлэригэр аргыс моойторуктары оҥорорго ылыста.
edersaas.ru.
Тэрилтэ билигин биирдиилээн экземплярдары, уопутунай холобурдары, оҥорор. Кэлэр өттүгэр, Үрдүк технологиялар пааркалара өйөбүлү ыллаҕына, бүтүн сиэрийэнэн таһаарар былааннаах.
Александр Кривошапкин, «Иһитиннэрэр-тэхиньиичэскэй киин» ХЭТ салайааччыта:
— Биһиги оҥоһукпут ырыынакка атыыланар электроннай моойторуктартан быдан атын уонна ордук. Хотугу дойду уһун тымныылаах, тыйыс килиимэтигэр сөп түбэһэр, энергияны харыстыыр, батарыайата биир сыл устата үлэлиир кыахтаах. Бырагырааманан хааччыйыытын бэйэбит оҥорбут буоламмыт, моойторук үлэтин үчүгэйдик салайабыт, онон табаһыттар тэхиньиичэскэй сервис өттүгэр эрэйдэниэхтэрэ суоҕа.
Аргыс моойторук икки блоктан турар. Электроннай өттө, ол иһигэр сигналы ылар-биэрэр чааһа ыйааһыны тэҥниир батарыайа блогуттан туспа сылдьар, сигнал блога таба арҕаһыгар туттарыллар. Туундара киэҥ дуолун устун сылдьар табалары эбэтэр сыһыыга мэччийэр сылгылары маннык ньыманан көрө-истэ сылдьыы үлэни быдан судургутутуоҕа итиэннэ сүппүттэри көрдүүр бириэмэни харыстыаҕа. Уһук хотугу сир уустук усулуобуйатыгар сөп түбэһэр итиэннэ уһун кэмнээх бытарҕан тымныыны тулуйар атын маннык аргыс мониторинг ситимэ билиҥҥитэ ханна даҕаны суох. Даҕатан эттэххэ, бу тэрилтэ инновационнай технологияларынан хотоойутук дьарыктанар, ол иһигэр сүөһү электроннай чиптэрин оҥорууга үлэлиир.
Раиса Сибирякова, «Саха сирэ» edersaas.ru.