Электроннай үлэ киниискэтигэр көһүү 2020 сыл ахсынньы 31 күнүнэн бүтэр. Ол туһунан Биэнсийэ пуондата иһитиннэрэр.
Электроннай үлэ киниискэтигэр көһөрү үлэһит бэйэтэ быһаарар. Ол эрээри, 2021 сылтан үлэҕэ саҥа киирэр дьоҥҥо кумааҕы үлэ киниискэтэ суох буолуоҕа, электроннай киниискэни эрэ оҥоруохтара.
Атыттар көһүөхтэрин баҕарар буоллахтарына, ахсынньы 31 күнүгэр диэри суругунан сайабылыанньа суруйуохтаахтар. Электроннай үлэ киниискэтин талбыт дьон кумааҕы киниискэлэрин илиилэригэр ылыахтара. Бу түгэҥҥэ кумааҕы киниискэ син биир электроннайы кытары тэҥҥэ туһаныллыан сөп. Кумааҕы киниискэни харыстаан харайыахха наада, тоҕо диэтэр, электроннай киниискэҕэ үлэ туһунан дааннайдар 2020 сылтан эрэ киирэллэр. Урукку дааннайдар, холобур, биэнсийэҕэ тахсарга наада буолуохтара.
Кумааҕы үлэ киниискэтин хаалларар буоллахха, үлэни биэрээччи дааннайдары кумааҕы уонна электроннай киниискэлэргэ иккиэннэригэр киллэрэр. Сайабылыанньа суруйбатах үлэһиттэргэ кумааҕы үлэ киниискэтэ хаалар, ону тэҥэ, электроннай үлэ киниискэтэ эмиэ оҥоһуллар.
Электроннай үлэ киниискэтигэр киирбит дааннайдары Биэнсийэ пуондатын саайтыгар Тус кэбиниэккэ киирэн, эбэтэр “Госуслуги” портал нөҥүө, төлөпүөннэргэ хачайдаммыт анал сыһыарыыларынан киирэн көрүөххэ сөп. Наада буоллаҕына, электроннай киниискэттэн информация кумааҕыга суруллан бэриллиэн сөп. Оннук суругу урукку үлэни биэрээччи, эбэтэр Биэнсийэ пуондатын управлениета, Элбэх өҥөнү оҥорор киин биэриэхтэрин сөп.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн