РФ Үлэҕэ, социальнай көмүскэлгэ министиэристибэтэ электроннай үлэ киниискэлэригэр көһүү кэнсиэпсийэтин бэлэмнээтэ. Билиҥҥитэ 2019 сыл тохсунньу 1 күнүттэн, эбэтэр 2020 сыл тохсунньу 1 күнүттэн көһүү буоларын быһаарсаллар.
Оттон РФ Үлэҕэ миниистирин солбуйааччы Любовь Ельцова этэринэн, ити социальнай партнерство үс өрүттэрэ хайдах биир тылы булан сөбүлэһэллэриттэн тутулуктаах.
Холобур, Арассыыйа көҥүл профсоюзтарын федерацията (ФНПР) кумааҕы үлэ киниискэлэрин барытын бүүс-бүтүннүү уларытары утарар. Электроннай киниискэлэри оҥорор да буоллахха, кумааҕы көрүҥэ эмиэ баар буолуохтаах диэн санаалаахтар. Тоҕо диэтэххэ, өскөтүн электроннай көрүҥ сүтэн хааллаҕына, киһи 30-40 сылынан биэнсийэҕэ тахсарыгар ыарахаттары көрсүөн сөп.
Санатар буоллахха, бу иннинэ Сбербаан салайааччыта Герман Греф кумааҕы киниискэлэр үлэни биэрээччилэргэ, гражданнарга бэйэлэригэр уонна Биэнсийэ фондатыгар табыгаһа суохтар диэн, электроннайга көһөрөрү көҕүлээбитэ. Кини этэринэн, киниискэни толорууга элбэх бириэмэ уонна каадыр үлэһитин сырата барар.
Ангелина ВАСИЛЬЕВА, “Саха сирэ” хаһыат, edersaas.ru