Тохсунньу 1 күнүттэн үлэҕэ наймылаһыы эйгэтигэр сокуоҥҥа уларыйыылар таҕыстылар.
Электроннай киниискэ диэн тугуй?
Сүрүн уларыйыы — үлэ ыстааһын туоһулуур үлэ киниискэтэ электроннай көрүҥҥэ көһүүтэ. Ааспыт сыл ахсынньы 31 күнүгэр диэри бары үлэһиттэр сайабылыанньа суруйалларыгар болдьох бэриллибитэ. Бу кэм иһигэр тус бэйэбит үлэ киниискэтин хайдах көрүҥнээх буоларын талыахтаах этибит. Электроннай көрүҥү талбыт үлэһиттэргэ үлэлэтээччитэ кумааҕы киниискэни илиитигэр туттарыахтаах этэ — бу докумуону харайыыны уонна учуоттааһыны үлэһиккэ бэйэтитигэр биэрэрин туоһулаан. Кумааҕы киниискэ күүһүн сүтэрбэт, электроннайы тэҥэ ыстааһы учуоттуур докумуонунан хаалар. Оттон үлэ электроннай киниискэтэ 2020 сылтан саҕалаан үлэһит ыстааһын ыытыыны саҕалыыр. Кэлин урукку сыллар суруктарын электроннайга эмиэ көһөрөр былаан баар — сокуон оҥорооччуларга ол туһунан бырайыак киирэн сытар.
Пенсионнай пуонда саайтыгар этиллэринэн, сайабылыанньаны суруйа илик үлэһит хаһан баҕарар суруйар бырааптаах. Оттон үлэһит олоҕун 2021 сылтан саҕалыыр гражданнар кумааҕы трудовойдара аны суох буолар, аҥардас электроннай докумуонунан ыстаастара ааҕыллар.
Хайдах туһанылларый?
Үлэ биэрээччи үлэһит туһунан сибидиэнньэлэри Арассыыйа Пенсионнай пуондатын (ПФР) саайтыгар, страховкалааччы кабинетын нөҥүө киллэриэн сөп, эбэтэр оператор нөҥүө, ПФР олохтоох уорганын килийиэннэри кытта үлэлиир сулууспатынан киллэриэн сөп. Ону таһынан, смартфоҥҥа анал сыһыарыы нөҥүө үлэлэһиэххэ сөп.
Үлэ киниискэтиттэн суруйууну кумааҕыга ыспыраапка быһыытынан көрдөөн ылыахха сөп. Бу өҥөнү дойду ханнык баҕарар уһугар, олохтоох сулууспаны кытта сибээһэ суох, ПФР эбэтэр МФЦ тэрилтэлэриттэн ылыахха сөп.
ПФР этэринэн, электроннай киниискэ сүрүн ордугунан информацияны дөбөҥнүк ылыы буолар. Ханна эрэ харалла сытар кумааҕыны көрдөөн ылыыттан быдан дөбөҥ буолара сабаҕаланар. Ону таһынан цифровой киниискэнэн пенсияҕа докумуону оҥоруу чэпчиэҕэ, тоҕо диэтэххэ, ПФР сирэй счетунан эбии докумуона суох ыытыахха сөп. Босуобуйалары оҥоруу эмиэ чэпчиэхтээх, ону таһынан судаарыстыбыннай тэрилтэлэр икки ардыларыгар үлэ туһунан дааннайдары мэнэйдэһии быдан судургу буолуо.
Ыраахтан олорон үлэҕэ кэпсэтии чэпчиэҕэ — ыстаас туһунан сибидиэнньэлэри электроннай почтанан СТД-ПФР эбэтэр СТД-Р формалары ыытан туоһулуохха сөп буолар.
Уонна үлэ киниискэтин сүтэрии кыһалҕата суох буолуоҕа. Өскөтүн кумааҕы докумуон умайан дуу, сүтэн дуу хаалыан сөп буоллаҕына, цифровой докумуон сүппэт.
Билиҥҥи кэмҥэ үлэ электроннай киниискэтин сүрүн итэҕэһинэн, наҕараадалар тустарынан сурук киирбэтэ буолар. Онон наҕараадалар, уордьан, мэтээл, хайҕа суруктар туспа докумуоннарынан туоһуланаллар.
Үлэҕэ киирии саҥа быраабылалара
2021 сылтан үлэ электроннай киниискэтэ киирбитинэн, үлэҕэ ылыы ирдэбилэ уларыйар.
Саҥа үлэһит үлэҕэ киирэригэр маннык докумуоннар ирдэнэллэр:
— Бэйэни туоһулуур дастабырыанньа (холобур, пааспар);
— Үлэ киниискэтэ эбэтэр электроннай үлэ киниискэтиттэн выписка — СТД-Р. Киһи бастаан үлэҕэ киирэр буоллаҕына, киниэхэ үргүлдьү электроннай үлэ киниискэтин аһыахтара;
— СНИЛС- кумааҕынан эбэтэр электроннай көрүҥүнэн;
— Байыаннай билиэт (байыаннай учуокка турар үлэһит буоллаҕына);
— Үөрэх, квалификация туһунан докумуоннар;
— Туһааннаах түгэннэргэ наркологияттан уонна холуобунай эппиэтинэскэ тардыллыы туһунан ыспыраапкалар.
Үлэ кодексатынан үлэҕэ ылыы, билиҥҥи курдук, 2021 сылга үлэһити кытары дуогабар түһэрсиллэр уонна штакка ылыы туһунан бирикээс суруллар.
2020 сылга Үлэ Кодексатыгар дистанционнай үлэ туһунан көннөрүүлэр киирбиттэрэ. Бу балаһыанньалар 2021 сыл маҥнайгы күнүттэн олоххо киирэллэр.
Үлэ биэрээччи ПФР-га ханнык иһитиннэриилэри биэрэрий
— үлэһит туһунан иһитиннэриини (араспаанньата, аата, аҕатын аата);
— үлэҕэ ылыы, атын үлэҕэ көһөрүү, ууратыы даатата:
— үлэлиир миэстэтин туһунан;
— оҥоһуллар тэрээһин (үлэҕэ ылыы, атын үлэҕэ көһөрүү, ууратыы);
— дуоһунаһа, идэтэ, исписээлинэһэ, квалификацията, үлэлиир салаата;
— үлэтин көрүҥэ;
— кадровай дьаһал (чыыһыла, ньүөмэр уонна докумуон көрүҥэ);
— үлэ дуогабарын тохтотуу төрүөттэрэ.
«Саха сирэ» хаһыат, edersaas.ru