Биэнсийэ пуондатын Саха сиринээҕи салаатын биэнсийэни анааһын салаатын үлэһиттэрэ ыйытыыларга эппиэттииллэр.
Ыйытыы: 2020 сылтан электроннай үлэ киниискэтэ киирэр дииллэр. Оччоҕо кумааҕы киниискэ наадата суох буолар дуо?
Эппиэт: Оннук, электроннай киниискэ диэн киирэн эрэр. Үчүгэйэ диэн, үлэһит хаһан баҕарар киирэн көрүөн сөп. Оттон үлэни биэрээччи өр кэмҥэ харайарыгар, дьыаланы-куолуну дьаһайарыгар судургутуйар.
Холобур, дааннайдары сыыһа суруйдахтарына, тута көннөрүөхтэрин сөп. Биэнсийэни оҥорторорго куоппуйа наадата суох буолар. Ону тэҥэ, судаарыстыбаннай өҥөнү ыларга дааннайдары туһаныахха сөп. Дааннайдар Биэнсийэ пуондатын базатыгар хараллаллар, манна куттала суох буолууну хааччыйыы күүстээх.
Электроннай үлэ киниискэтин ыларга үлэһит бэйэтин сөбүлэҥин биэриэхтээх, ким да кэтэхтэн оҥорбот. 2020 сыл бүтүөр диэри сайабылыанньа суруйуохтаах. Оччоҕо кумааҕы киниискэтин бэйэтигэр биэрэллэр. Оттон электроннайга көһүөн баҕарбатах киһи кумааҕы киниискэтэ оннунан хаалар, үлэни биэрээччи дааннайдары салгыы онно суруйар.
Онтон 2021 сылтан үлэҕэ саҥа киирэр дьоҥҥо кумааҕы киниискэ оҥоһуллубат, электроннай эрэ киниискэлээх буолаллар.
Дааннайдары Биэнсийэ пуондатыттан, Элбэх өҥөнү оҥорор киинтэн, каадыр отделыттан, эбэтэр Биэнсийэ пуондатын саайтыгар Тус кэбиниэккэ киирэн ылыахха сөп.
Бэлэмнээтэ Ангелина Васильева, «Саха сирэ» хаһыат, edersaas.ru