Өлөөнтөн соһуччу иһитиннэрии кэллэ. Табаны иитэр учаастакка оробуочай сырыынан тиийбит улуус баһылыга Александр Иванов эмискэ сүрэҕэ тохтоон тыына быстыбыт диэн СИА иһитиннэрэр.
Александр Степановичы биир дойдулаахтара олус ытыктыыллара уонна эрэнэллэрэ. Ааспыт быыбарга киниэхэ 95 % быыбардааччы куоластаабыта элбэҕи этэр. Кини улууһу салайбыт кэмигэр табаны иитии, булт курдук төрүт дьарыктар эрэ буолбакка, улууска бырамыысыланнас сайдыбыта.
Талааннаах салайааччы, төрөөбүт дойдутугар бэриниилээх киһи суох буолбута Өлөөн улууһугар да, өрөспүүбүлүкэҕэ да улахан сүтүк буолла.
Иванов Александр Степанович 1969 сыллаахха кулун тутар 2 күнүгэр төрөөбүтэ.
2002 сыллаахха М.К. Аммосов аатынан Саха судаарыстыбаннай университетын бүтэрбитэ.
2013 сыллаахха балаҕан ыйын 8 күнүгэр Өлөөн эбэҥки национальнай оройоунун баһылыгынан талыллыбыта.
2018 сыллаахха балаҕан ыйын 9 күнүгэр иккистээн баһылыгынан талыллыбыта.
Чугас дьонугар, аймахтарыгар дириҥ кутурҕаммытын биллэрэбит.
edersaas.ru