Өлөөн эбэҥки национальнай оройуонугар «Ростелеком» хампаанньа оптоволокно сибээһин лиинийэтин тутуутун түмүктээтэ. Саха сирин Арктикатын сиригэр бастакынан Өлөөн оройуона оптическай лиинийэҕэ холбонно.
Саҥа сибээскэ олохтоохтор Өлөөн улууһун урукку баһылыгын Александр Иванов аатын иҥэрдилэр. Кини бу бырайыак олоххо киирэригэр үгүс сыратын уурбута. ВОЛС уһуна — 432 км.
Түргэн интэриниэт Өлөөн уонна Харыйалаах сэлиэнньэлэрин 12 социальнай эбийиэгэр холбонно: фельдшер-акушер пуунугар, кулуупка, оскуолаҕа, уһуйааҥҥа, оройуон дьаһалтатыгар. Аны чугаһынан кэмҥэ 1000 дьиэҕэ киириэҕэ. Маны сэргэ Өлөөҥҥө Саха сирин Арктикатыгар бастакынан Мегафон хампаанньа 4G сибээһэ кэллэ.
Өлөөн олохтоохторун бу үөрүүлээх түгэнинэн Ил Дархан Айсен Николаев эҕэрдэлээтэ. Ил Дархан оробуочай сырыынан Өлөөҥҥө баар.
«Өрөспүүбүлүкэбит цифровизациятын устуоруйатыгар үтүө күн буолла. Оптическай лиинийэлэр Хотугу эргимтэни нөҥүөлэн Өлөөҥҥө кэллилэр. Киһи ханна олороруттан тутулуга суох — Дьокуускай да буоллун, тус хоту да буоллун аныгы олох сайдыытын туһаныахтаах дии саныыбын», — диэн Ил Дархан эттэ.
Ил Дархан уонна Бырабыыталыстыба пресс-сулууспата.
Андрей Сорокин хаартыската.