Ханнык улуустарга элбэх ыалдьыы бэлиэтэннэ?
Үгэс курдук, бүгүн өрөспүүбүлүкэ суһал ыстаабын салайааччытын солбуйааччы Ольга Балабкина брифинэ буолла. Ольга Валерьевна этэринэн, санитарнай-эпидемиологическай турук өрөспүүбүлүкэҕэ уустук соҕус. Ааспыт сууккаҕа 219 киһи дьаҥҥа хаптарбыт. Дьокуускай куоракка 118 киһи ыалдьыбыта бэлиэтэммит. Өлүөхүмэҕэ, Алдаҥҥа, Сунтаарга саамай элбэх ыалдьааччы баара биллибит.
Балаһыанньа өссө кытаатыан, СӨ Ил Дарханын Ыйааҕар олоҕуран, дьаҥнаабыт киһи (ОРВИ) бэйэтин хааччахтанан олороро ирдэммитэ уонна бу дьаҥнаабытынан бырааһы ыҥырыы ковидынан сутуллууну түргэнник булууга төһүү буолбут.
Бүгүн сарсыарда өрөспүүбүлүкэ хамсыгы бохсууга суһал ыстааба оройуоннар ыстааптарын кытта мунньах ыыппыт. Онно улуустар баһылыктарыгар дьаҥ саҥа көрүҥэ тарҕаныытын тус хонтуруолга ылалларыгар, чуолаан, эмкэ-томҥо уонна бу эмп хайдах тиэрдиллэригэр эмиэ болҕомтону ууралларыгар сорудахтаммыт.
2196 чинчийии суукка устата ыытыллыбыт.
Түмүгэр О.Балабкина аҕам саастаах дьоҥҥо бу хамсык кэмигэр болҕомтолоохтук сыһыаннаһарга, кинилэри харыстыырга көрдөстө. Кини этэринэн, дьиэтигэр соҕотох олорооччу элбэх, онон, саатар, чугас ыаллара кинилэр дьиэттэн киирэллэрин-тахсалларын билэ-көрө олороллоругар эттэ. Тоҕо диэтэххэ, кэлиҥҥи кэмҥэ соҕотох олорооччулар ортолоругар ыараханнык ыалдьыбыт киһи элбэх.
Онон чэгиэн буолуҥ, мааската кэтиҥ, харыстаныҥ!
Бэлэмнээтэ Женни Стрюкова
Хаартыска: интэриниэттэн