“Якутия” авиахампаанньа 2018-2019 сылларга 19 хайысханан (ол иһигэр саҥа 8 хайысханан) субсидиялаах көтүтүө. Сылы эргиччи субсидиялаах билиэтинэн көтүөххэ сөп буолла. Ону тэҥэ, бу сэтинньиттэн ыла элбэх оҕолоох ыаллар эмиэ субсидиялаах чэпчэки билиэтинэн көтөр буоллулар. Урут биэнсийэлээхтэр, 23 саастарын туола илик ыччаттар, оҕолор, инбэлииттэр уонна кинилэри арыаллааччылар эрэ туһанар кыахтаахтара.
edersaas.ru
2017 сылга Уһук Илинтэн 600 тыһыынча киһи маннык субсидиянан туһаммыт. Санатар буоллахха, Владимир Путин биир мунньахха субсидиялаах көтүүлэри элбэтэргэ Арассыыйа бырабыыталыстыбатыгар сорудах биэрбитэ.
Уһук Илиҥҥэ көтөр хампаанньаларга эбиллибит сыана нолуогун (НДС) сотор сокуон барылын олоххо киллэрэргэ үлэ бара турар. Бэлиэтээн эттэххэ, маннык чэпчэтии 2020 сылга диэри үлэлиирэ чопчуланна. Билигин авиахампаанньалар өҥөлөрүгэр 10%-наах нолуок төлүүллэр, Крымҥа уонна кыраныысса таһыгар көтөөччүлэр эрэ босхолоноллор.
Элбэх оҕолоох ыаллар манныгы учуоттуохтарын наада:
— 23 сааһын туола илик оҕолоро күнүскү үөрэххэ үөрэнэр буолуохтаах, ону бигэргэтэр ыспыраапка хас семестр аайы наада.
— Оҕону иитэ ылбыт уонна толорута суох дьиэ кэргэттэр эмиэ туһаныахтарын сөп.
— Нолуокка, судаарыстыбаҕа туох да иэһэ суох буолуохтаахтар.
— Элбэх оҕолоохторун бигэргэтэр ыспыраапканы социальнай көмүскэл салаатыттан баран ылаллар.
— Оҕо санаторийга, чэбдигирдэр кииҥҥэ сынньаммыт буоллаҕына, ону туоһулуур докумуоннар наадалар.
Барыта сөпкө толоруллубут буоллаҕына, төрөппүттэр айан ороскуотун аҥаарын уонна путевка харчытын (50-90%-нын) ылыахтарын сөп.
Ангелина Васильева, “Саха сирэ” хаһыат, edersaas.ru
Субсидиялаах билиэт сыаната:
Дьокуускай-Владивосток-Дьокуускай – 6400 солк.*
Дьокуускай-Москва-Дьокуускай – 7000 солк.*
Дьокуускай-Санкт-Петербург-Дьокуускай – 7000 солк.*
Дьокуускай-Сочи-Дьокуускай – 7800 солк.*
Дьокуускай-Красноярскай-Дьокуускай – 5500 солк.*
Дьокуускай-Новосибирскай-Дьокуускай – 5500 солк.*
Дьокуускай-Екатеринбург-Дьокуускай – 6000 солк.*
Дьокуускай-Благовещенскай-Дьокуускай – 6400 солк. (саҥа рейс).*
Дьокуускай-Иркутскай-Дьокуускай – 2500 солк. (саҥа рейс).*
Дьокуускай-Магадан-Дьокуускай – 1500 солк. (саҥа рейс).*
Дьокуускай-Хабаровскай-Дьокуускай – 2500 солк. (саҥа рейс).*
Дьокуускай-Соҕурууҥу Сахалинскай-Дьокуускай – 2500 солк. (саҥа рейс).*
Нерюнгри-Москва-Нерюнгри – 7100 солк.*
Нерюнгри-Новосибирскай-Нерюнгри – 6000 солк.*
Иркутскай-Өлүөхүмэ-Иркутскай – 2000 солк.*
*биир өттүгэр көтөр билиэт сыаната.