Норуодунай бэйиэт Наталья Харлампьева хоһоонугар “Кырыйдыннар кырдьар аналлаахтар, оттон эн эдэргин» диэн уот харахха эппит.
edersaas.ru
Бу тыллары эдэрдии эрчимнээх, чоҕул харахтарын уотун умулларбатах, олоххо интэриэстэрин сүтэрбэтэх, үлэттэн дьолломмут, тулуур-дьулуур туоһулара — аҕам саастаахтарбыт, ытык кырдьаҕастарбыт – дьиҥ олохторунан көрдөрөн сөхтөрдүлэр.
Биһиги да нэһилиэк онтон туора турбатыбыт. Айылҕаны кытары ыкса сибээстээх, ийэ сирдиин ситимнэрин ыһыктыбатах, буорга олордубуттара силигилии ситэр, сиргэ тириэрдибиттэрэ сириэдийэ тыллар Елена Павловна Турик уонна Татьяна Гаврильевна Дьячковская кытыннылар. Кинилэр ардаҕы-силбиги аахсыбакка хомунан-тэринэн, Дьокуускай куорат сынньалаҥ пааркатыгар тиийэн, бар дьоннуун бииргэ буоллулар. Дьэ, манна баар эбит: эҥин эгэлгэ үүнээйи, араас дойдуттан аҕалыллыбыт, харах халтарыйар кэрэ көстүүлээх дьикти сибэккилэрэ, итии дойдуга үүнэр минньигэс астар. Дыняны, арбуһу этэ да барбаккын, виноградынан да соһуппаккын. Тоҕо диэтэххэ, кыһалыннахха, тутан баран ыһыктыбатахха, кинилэри аҕыс ый тымныылаах, аан туманнаах кыһыннаах Сахабыт сиригэр үүннэриэххэ сөбүн толору дакаастаатылар.
Татьяна Гаврильевна сибэккини үөрэтиигэ, үүннэриигэ кустук өҥүнэн чаҕылыта оонньотон, бастакы миэстэ буолла. Елена Павловна эмиэ бар дьонун үөртэ уонна быыстапкаҕа кэлбит элбэх оҕолоох дьиэ кэргэҥҥэ, ытык кырдьаҕастарга өлгөмнүк үүммүт астарын бэлэх уунна.
Тэрээһин үлэҕэ актыыбынайдык уонна айымньылаахтык кыттыбыт Хатас олохтоох дьаһалтатын кэлэктиибигэр махталбытын тиэрдэбит.
“Саха сирэ”, edersaas.ru сайтка анаан Наталья РУФОВА.
Ааптар түһэриилэрэ