Ханнык баҕарар бырааһынньыкка күүппэтэх өттүгүттэн соһуччу бэлэҕи тутартан саҕа күндү суох.
edersaas.ru
Бэҕэһээ Нам улууһун биэс элбэх оҕолоох, соҕотоҕун иитэр ийэлэр уонна аҕалар дьиэ кэргэттэрэ уопсастыбанньыктартан ас бородууктатын бэлэҕи тутан, олус үөрдүлэр.
Бу туһунан Нам улууһунааҕы Социальнай-экэнэмиичэскэй сайдыы пуондатын салайааччыта Андрей Бочкарев иһитиннэрдэ:
— Олоххо көхтөөх уопсастыбанньыктары кытта кэпсэтэн баран, элбэх оҕолоох ыалларга аадырыстаах көмөнү оҥорорго санаммыппыт.
Өрүү улуус араас тэрээһиннэригэр үтүө санаатынан спонсордаан кыттыыны ылар «Нэлэгэр «маҕаһыын салалтатын кытта сүбэлэһэн баран, ас-үөл атыыласпыппыт. «Нэлэгэрдэр» оҕолорго диэн эбии хомпуоттан, минньигэс астан арааран биэрбиттэрэ.
Бу бастакы саҕалааһыммыт буолар. Аны ыам ыйын 9 күнүгэр — Улуу Кыайыы бырааһынньыгар элбэх оҕолоох ыалларга Аһымал аахсыйатын тэрийиэхпит.
Онтон ыам ыйын 15 күнүгэр — Дьиэ кэргэн күнүгэр улууспут нэһилиэктэрин хабыахпыт. Билигин нэһилиэктэртэн иккилии-үстүү элбэх оҕолоох ыал испииһэгин оҥорууну саҕалаатыбыт.
… Ити курдук, Ийэ дойдуга бэриниилээх буолуу сылыгар сыстыганнаах ыарыы өрө турбут уустук кэмигэр Ленскэй сэлиэнньэтин уопсастыбанньыктара дьиэҕэ олоруу эрэсиимин тутуһан олорор элбэх оҕолоох ыаллары өйөөн, аһынан-үөлүнэн хааччыйаллара — бастыҥ холобур.
Елена ПОТОЦКАЯ, «Саха сирэ» хаһыат, edersaas.ru
Хаартыска — Андрей Бочкарев тиксэриитэ.