Дьокуускай куорат дьаһалтата үстэн элбэх оҕолоох дьиэ кэргэттэргэ Тулагы-Киллэм нэһилиэгин сиригэр-уотугар 196 сир учаастагын түҥэттэ. Учаастактары тыырыынан Сир-уот сыһыаннаһыыларыгар ааҕыныстыба дьарыктанар.
Билигин босхо сири ыларга 6,5 тыһыынча элбэх оҕолоох ыал уочаракка турар. Кинилэртэн 260 ыал олорор дьиэни тупсарыыга наадыйааччылар учуоттарыгар турар.
— Элбэх оҕолоох ыалларга учаастактары биэрии 2017-2018 сылларга көхтөөхтүк ыытыллан баран, тохтоон хаалбыта. Киллэм сиригэр-уотугар барыта 257 учаастак бэриллиэҕэ, билиҥҥи кэмҥэ 197 учаастак бэлэм. Бу сылга докумуоннара ситэринэн көрөн, учаастактар уочаратынан бэриллэн иһиэхтэрэ, — диэн Дьиэ-уот, сир сыһыаннаһыыларыгар департамент салайааччытын солбуйааччы Игнатий Попов этэр.
Сир учаастактара “ИЖС” хайысхалаахтар, Дьокуускай куорат генеральнай былааныгар киирбиттэр, уу ылбат сиригэр бааллар, кэлин манна оскуола уонна оҕо саада тутуллара былааннаммыт. Чугаһынан оптуобус сылдьар суола ааһар. Инникитин инженернэй инфраструктуранан хааччыллыахтара диэн куорат дьаһалтата эрэннэрэр.
Элбэх оҕолоох дьиэ кэргэттэргэ салгыы Бүлүүлүүр, Намныыр, Маҕанныыр суоллар чугастарынан сир учаастактарын биэрэри былаанныыллар. Сир учаастактарын биэрии туһунан биллэриилэри yakutskcity.ru саайтка киирэн, билсиэххэ сөп.
Ангелина Васильева, «Саха сирэ» хаһыат, edersaas.ru
Хаартыска: yakutskcity.ru