РФ бэрэсидьиэнэ Владимир Путин анал этиитигэр элбэх оҕолоох дьиэ кэргэттэргэ нолуокка чэпчэтиилэри киллэрэр туһунан таарыйбыта. Быйылгыттан бу миэрэ олоххо киирдэ. Чопчулаатахха, ахсынньы 1 күнүттэн хойутаппакка, бу ааһар сыллааҕы нолуогу төлүүр кэмҥэ, дьиэ кэргэттэр маны чахчы билиэхтэрэ.
Нолуокка маннык чэпчэтиилэр көрүллэллэр:
—18 саастарын туола илик үстэн элбэх оҕолоох дьиэ кэргэттэр 600 кв.м. иэннээх сир учаастагар нолуок төлөөбөттөр. Өскөтүн, учаастак иэнэ 800 кв.м. буоллаҕына, бу ыал 200 кв.м. иһин төлүүр. Бу чэпчэтии биир эрэ учаастакка бэриллэр.
— Дьиэ-уот нолуогар чэпчэтии төрөппүт хас биирдии сокуоннай сааһын туола илик оҕотун ахсын, кыбартыыра 5 кв.м. иэнигэр бэриллэр. Чааһынай дьиэҕэ олорор буоллаҕына – 7 кв.м.
Холобур, 4 оҕолоох ыаллар кыбартыыраларыгар чэпчэтии 20 кв.м. көрүллэр, чааһынай дьиэлээхтэргэ – 28 кв.м.
Билиҥҥитэ, бу нолуокка чэпчэтиини ылар туһунан сайабылыанньа сурулуннаҕына эрэ бэриллэр. Ол эрээри, бу боппуруоһу сайабылыанньата да суох быһаарар туһунан кэпсэтии бара турар. Ол туһунан көрдөрөр-иһитиннэрэр сириэстибэлэр нөҥүө нэһилиэнньэҕэ информацияны тиэрдиэхпит диэн, Нолуок сулууспатын инспекцията иһитиннэрэр.
Ангелина ВАСИЛЬЕВА, “Саха сирэ” хаһыат, edersaas.ru