Элбэх оҕолоох ыаллар дьиэлэнэллэригэр — 500 мөлүйүөн

Бөлөххө киир:

Сокуоннай саастарын туола илик, 5-тэн элбэх оҕолоох дьиэ кэргэттэр кыбартыыра, дьиэ атыылаһалларыгар, эбэтэр тутталларыгар биирдэ бэриллэр социальнай көмө быраабылаларыгар уларыйыылар киирдилэр.

СӨ бырабыыталыстыбатын мунньаҕар бу сайын быраабылалары тупсарар уларытыылары ылыммыттара. Холобур, бу сылга испииһэк (реестр) номнуо бигэргэммитин кэннэ, олорор усулуобуйаны тупсарарга наадыйааччы быһыытынан учуокка туруу күнэ-дьыла суутунан уларыйбыт буоллаҕына, испииһэк саҥаттан бигэргэнэр.
Ону тэҥэ, ыал олорор дьиэнэн хааччыллыытын таһыма дьиэ кэргэн бары чилиэннэрин бас билиитигэр баар дьиэлэрин (“социальный найм”, «найм жилых помещений жилищного фонда социального использования”, о.д.а. дуогабардарынан) уопсай суумаларыттан ааҕыллар (РФ Олох-дьаһах кодексын чэрчитинэн).
Өскөтүн дьиэ кэргэн чилиэнэ хас да атын сиргэ (улууска) бас билэр дьиэлээх буоллаҕына, кини олорор сиригэр олохтоммут учуот нуормаларынан сирдэтэн, олорор дьиэнэн хааччыллыы таһыма быһаарыллар.
Бу уларыйыылар элбэх оҕолоох дьиэ кэргэттэр олорор усулуобуйаларын тупсарыыга, дьиэни ылар ньымалара чэпчииригэр туһуланаллар, быдан көдьүүстээх буолуохтаахтар. Онон судаарыстыбаннай социальнай бэлиитикэ ыытылларыгар көмөлөөх буолуоҕа.
Санатар буоллахха, быйыл бу көмөнү ылааччылар ахсааннара икки төгүл элбиэхтээх. Ол курдук, маннык көмөнү быйыл 14 улуустан, куораттан 124 дьиэ кэргэн, ону тэҥэ, Сунтаар, Ленскэй улуустарыттан 10-тан элбэх оҕолоох 2 ыал ылыахтара.
Быйыл бу сыалга өрөспүүбүлүкэ бүддьүөтүттэн 500 мөлүйүөн солкуобай көрүллүбүтэ. Ону тэҥэ, сыл устата 5-тэн элбэх оҕолоох дьиэ кэргэн ахсаана эмиэ лаппа эбилиннэ.
2021 сыллаахха 56 дьиэ кэргэн бу төлөбүрү ылан, олорор усулуобуйатын тупсарбыта. Көмө уопсай суумата – 199,2 мөлүйүөн солкуобайга тэҥнэспитэ. Ил Дархан Айсен Николаев Ил Түмэҥҥэ Анал этиитигэр кэлэр 5 сыл иһигэр 5-тэн элбэх оҕолоох ыаллар бу көмөнү ыларга уочараттарын суох гынарга сорудахтаабыта. Онон бүддьүөттэн көрүллэр көмө суумата эмиэ улаатан иһэр кэриҥнээх.

Ангелина Васильева, «Саха сирэ» хаһыат, edersaas.ru

Хаартыска: aif.ru

+1
0
+1
0
+1
0
+1
0
+1
0
+1
0
+1
0