Элбэх оҕолоох Новгородовтар Арассыыйа наҕараадатын туттулар

Бөлөххө киир:

Элбэх оҕолоох эдэр ыал Валентина, Айаал Новгородовтар бэҕэһээ Д.К.Сивцев-Суорун Омоллоон аатынан СӨ Опера уонна балет тыйаатырыгар, Өрөспүүбүлүкэ күнүн көрсө ыытыллыбыт тэрээһиҥҥэ, “Төрөппүт албан аата” Арассыыйа судаарыстыбаннай наҕараадатын туттулар. Наҕарааданы Ил Дархан Егор Борисов туттарда.

Аграфена КУЗЬМИНА, “Саха сирэ” хаһыат, edersaas.ru


Валентина, Айаал Новгородовтар – Култуура кэллиэһин выпускниктара. Иккиэн үҥкүүһүттэр. Үөрэхтэрин бүтэрээт, 1996 сыллаахха ыал буолбуттара. Билигин Чурапчы улууһугар Хоптоҕо нэһилиэгэр үлэлии-хамсыы сылдьаллар. Айаал Прокопьевич – Дириҥнээҕи оҕо искусствотын оскуолатын дириэктэрэ. Валентина Ревовна – хореограф. Кинилэр сэттэ оҕолоохтор.
Улахан кыыстара Алина номнуо үөрэҕин бүтэрэн билигин үлэлии сылдьар. Уоллара Мартьян Техническэй колледжка үөрэнэр. Иккис кыыс Сайаана – Чурапчытааҕы спортивнай интернат-оскуола онус кылааһын үөрэнээччитэ. Чэпчэки атлетиканан дьарыктанар. Игирэ кыргыттар Марьяна, Дарьяна Дириҥнээҕи орто агрооскуолаҕа үһүс кылааска үөрэнэллэр. Оттон кыралар Ариан, Рево “Ыллык” уһуйаан иитиллээччилэрэ.
Новгородовтар – нэһилиэккэ, улууска холобурга сылдьар ыал буолаллар. Иккиэн улуус, нэһилиэк уопсастыбаннай үлэтигэр көхтөөхтүк кытталлар. Ол курдук, Айаал Прокопьевич дириэктэрдиирин таһынан Хоптоҕо нэһилиэгэр дьокутаатынан талыллан үлэлиир. Быйыл Дьокуускай куоракка ыытыллыбыт дьокутааттар бастакы сийиэстэригэр дэлэгээт быһыытынан кыттыбыта. Ону сэргэ Дириҥнээҕи норуодунай хорга, эр дьон вокальнай ансаамбылыгар дьарыктанар. Онтон Валентина Ревовна үҥкүүнэн дьарыктанарын сэргэ, “Алаас кыргыттара” вокальнай ансаамбылга ыллыыр. Онон иккиэн үҥкүүнү, ырыаны өрө тутан нэһилиэк, улуус уопсастыбаннай олоҕор көхтөөхтүк кытталлар. Уонна оҕолорун да оннукка иитэллэр. Кинилэр бэлиэтииллэринэн, оҕолор төрөппүттэр холобурдарыгар уһуйуллан тахсыахтаахтар.
Бастатан туран, төрөппүт оҕотун бэйэтин холобурунан иитэр. Оҕону наһаа аһары такайар наадата суох. Төрөппүт оҕо бэйэтин баҕатын, ханнык үөрэххэ, ханнык хайысханан барарын учуоттуохтаах уонна истиэхтээх. Хас биирдии төрөппүт бэйэтэ педагог буоллаҕа”, — диэн этэр ыал аҕата Айаал Прокопьевич.
Ону сэргэ, Новгородовтар оҕону үлэнэн иитии улахан суолталааҕын этэллэр.
Тыа сиригэр олорор оҕо үлэҕэ быдан сыстаҕас буолар. Уолаттар дьиэ тас өттүгэр, муус-мас киллэриитигэр, оттон кыргыттар дьиэ ис үлэтигэр кыра эрдэхтэриттэн сылдьаллар. Оҕону иитиигэ күннээҕи режим улахан суолталаах. Итини ийэбит Валентина кыраҕытык кэтиир. Дьоммут сүөһү-ас иитэллэр. Онно күүс-көмө буолабыт. Сайынын окко, сир аһыгар оҕолорбутун сыһыаран үлэлэтэбит. Сынньалаҥ, үлэ буоллун барытыгар бииргэ сылдьабыт. Манна даҕатан эттэххэ, оҕолорбутун иитиигэ ийэлэрбит Валентина Егоровна Мартьянова, Евдокия Михайловна Новгородова улахан көмөлөөхтөр”, — диэн бэлиэтиир Айаал Прокопьевич. Кини этиитин ситэрэн: “Оҕо оҕоттон үөрэнэр ээ. Улахаттарбыт кыраларбытын иитиигэ улахан көмө буолаллар. Бэйэ-бэйэлэрин көрсө, көмөлөһө улааталлар. Оҕо оҕоттон үөрэнэрэ быдан түргэн эбит. Биир бэйэм, балтым кэлиэр диэри өр баҕайы соҕотох сылдьыбытым. Элбэх оҕолоох ыалга наһаа ымсыырарым. Ол иһин ыал буоллахпына, элбэх оҕолонуом дии саныырым”, — диэн бүччүм санаатын тириэрдэр ыал ийэтэ Валентина Ревовна.
Элбэх оҕолоох ыалга кэлиҥҥи кэмҥэ судаарыстыба өттүттэн үгүс көмө оҥоһуллар буолла. Новгородовтар дьиэ кэргэн судаарыстыбаннай бырагыраамаҕа киирсэн 2015 сыллаахха Дьокуускай куоракка дьиэ ылбыттара. “Социальнай көмө чэрчитинэн, 2,4 мөл. солк. суумаҕа биир хостоох кыбартыыра ылан олоробут. Бырагыраама усулуобуйатынан, биэстэн элбэх оҕолоох, оҕолорбут 18 саастарын туола илик буолуохтаахтар этэ. 2015 с. оруобуна ити ирдэбиллэргэ сөп түбэһэн, киин куоракка дьиэлэнэн билигин оҕолорбут үөрэнэллэригэр, үлэлииллэригэр усулуобуйаланныбыт. Ити биһиэхэ олус улахан көмө”, — диэн үөрэллэр Новгородовтар.
“Төрөппүт албан аатын” ылыы улахан эппиэтинэс. Бу наҕараада Арассыыйаҕа 2009 сылтан саҕалаан сэттэ уонна онтон элбэх оҕолоох ыалга бэриллэр. Итиннэ барыта 317 ыал тигистэ.
Түгэнинэн туһанан, өрөспүүбүлүкэ салалтатыгар, Ил Дархан Егор Борисовка, Чурапчы улууһун баһылыгар Андрей Ноговицыҥҥа, ону сэргэ Хоптоҕо нэһилиэгин баһылыгар Дмитрий Дьячковскайга, улуустааҕы дьиэ кэргэн дьыалаларыгар отдел салайааччытыгар Татьяна Бушковаҕа, улуустааҕы култуура управлениетын салайааччытыгар Дмитрий Поповка, ону сэргэ таҥаспытын-саппытын тигэн биэрбит “Дьүөгэ” тэрилтэҕэ улаханнык махтанабыт”, — диэн түмүккэ Новгородовтар дьиэ кэргэн махталларын тиэртилэр.

Новгородовтар дьиэ кэргэн ситиһиилэрэ:

2000 с. “Үҥкүүлүүр эдэр саас” улуустааҕы куонкуруска “Көрөөччүлэр биһирэбиллэрэ” номинация хаһаайыннара;

2002 с. “Эдэр ыал” улуустааҕы куонкуруска иккис миэстэ;

2004 с. “Дьиэ кэргэн дьоллоох түгэнэ” фотокуонкуруска 1 миэстэ;

2006 с. “Мозаика” өрөспүүбүлүкэтээҕи турнирга 1 миэстэ;

2008 с. “Туруктаах  дьиэ кэргэн – нэһилиэк сайдар кэскилэ” куонкурус лауреаттара;

2008 с. “Ийэм, аҕам уонна мин” өрөспүүбүлүкэтээҕи күрэхтэһии кыттыылаахтара;

2008 с. “Кылаас хоббита” өрөспүүбүлкэтээҕи турнирга 1 миэстэ;

2009 с. “Ийэм, аҕам уонна мин — спортивнай дьиэ кэргэн” оскуола иһинээҕи турнирга 1 миэстэ;

2010 с. СӨ Дьиэ кэргэн уонна оҕо аймах дьыалаларыгар кэмитиэтин Гранын хаһаайыннара;

2011 с. А.И.Софронов-Алампа төрөөбүтэ 125 сылыгар анаммыт дьиэ кэргэн сахалыы аныгылыы таҥаһын өрөспүүбүлүкэтээҕи куонкуруһун Гран-При хаһаайыннара;

2012 с. Чурапчы улууһугар олохтоммут СӨ президенин Е.А.Борисов ийэтин аатынан “Бастыҥ ийэ” бириэмийэ бастакы лауреаттара;

2013 с. “Далбар хотун” улуустааҕы куонкуруска “Мааны хотун” номинация хаһаайката;

2015 с. “Ийэ албан аата” бэлиэ хаһаайката.

Аграфена КУЗЬМИНА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0