Тас дойдулар Арассыыйаҕа санкция биллэриилэрин туһунан блогер, элбэх оҕолоох ийэ Тукиш — Туйаара Николаева санаатын үллэстэр.
— Дьон ордук сыана ыарыыр диэни истэн уолуйбута. Санкция киирэн, ханнык эрэ табаар суох буолар, миэбэл маҕаһыына сабыллар үһү диэн этэллэр. Оннук буолар түгэнигэр атын кыахтар арыллаллар дии саныыбын. Кинилэр атыылыыр миэбэллэрин ханнык баҕарар кыһаммыт, соруммут дьахтар өссө ордук гына оҥорон таһаарар кыахтаах. Биһиги бэйэбит хамсаммакка, харчыга бэлэми атыылаһа үөрэнэн хаалбыппыт. Санкциянан сибээстээн, олохтоох миэбэли оҥорооччулар да, биирдиилээн дьон даҕаны бэйэлэрэ оҥостор, ону ааһан дьоҥҥо атыылыыр кыахтара үрдүөҕэ. Билигин олохтоох маастардар миэбэли үксүн оһуордаан-мандардаан, сахалыы оҥороллор. Маны арыый аччатан, Европалыы көстүүлээн биэрдэр, атыыга хамаҕатык барыа, маҕаһыыннарга атыыланар миэбэлтэн туох да уратыта суох, хаачыстыбатынан оннооҕор лаппа ордук буолуо этэ. Ити миэбэлгэ эрэ буолбакка, таҥаска-сапка эмиэ сыһыаннаах.
Ас-үөл сыанатын туһунан эттэххэ, олохтоох дьон, дьиҥэр, бэйэбит үрдэттибит. Кууһунан атыылааччылар эмиэ инньэ дииллэр. Кэлбит табаар ыарыа суохтааҕын дьон өрө сүүрэн, атыылаһааччылар онтон харчы киллэринэр түгэни мүччү туппат буоллахтара.
Биллэн турар, бородуукта үрдээбитэ көннөрү дьоҥҥо охсуулаах буолуо. Ол эрээри, мантан ыла ыһа-тоҕо буолбакка, толкуйдаан атыылаһыахпыт. Уонна бэйэбит хаһаайыстыба тэринэрбит ордук буолсу. Холобур, аҥаардас беляш да астыыры ылан көрдөххө, бэйэтэ ынахтаах, кууруссалаах киһи маҕаһыынтан бурдук, доруоһа уонна туус эрэ атыылаһара ирдэнэр.
Биир бэйэм быйыл сайын куурусса ылан иитээри сылдьабын. Былырыын 10 кууруссаны ылан улууска дьоммутугар ыыппыппыт. Ол уон куурусса сайыны быһа сымыытынан үс дьиэ кэргэни аһаппыта, эбиитин мунньан биһиэхэ кытта ыыппыттара. Онон куурусса атыылаһан иитэн, сайынын сымыытын сиэн, күһүн этин идэһэлэниэххэ сөп диэн толкуйдуубун. Уонна сыыйа-баайа оҕуруот олордор былааннаахпын. Бу иннинэ атыылаһыахха сөп диэн улаханнык наадыйбат этим. Сыана үрдүүр түгэнигэр чугастааҕы сылларга манна хамсанар наада буолсу, билигин тэпилииссэм, миэстэм суох.
Онон санкция киирэн дьону хамсатыа дии саныыбын. Бэлэми атыылаһан олорбут эбит буоллахпытына, билигин бэйэбит үүннэрэр, оҥорор туһунан толкуйдуубут.
Людмила ПОПОВА, “Саха сирэ” хаһыат, edersaas.ru