Элбэх оҕолоох дьиэ кэргэттэри өйүүр сыаллаах-соруктаах «Малый бизнес для большой семьи» диэн үөрэтэр бырайыак ситиһиилээхтик ыытыллар.
Бу туһунан СӨ Предпринимательство министиэристибэтэ иһитиннэрэр. Биисинэһи тэрийиигэ, үлэлэтиигэ Саха сирин элбэх оҕолоох 28 дьиэ кэргэнэ кыттар. Маны сэргэ, кинилэр биисинэс-идея куонкуруска күрэстэһэллэр. Бырайыакка Дьокуускайтан, Намтан, Тааттаттан, Амматтан кыттыыны ылаллар. Кинилэр биэс күн устатыгар биисинэс-эспиэрдэргэ үөрэнэллэр, сүбэ-ама ылаллар.Оттон нэдиэлэ бүтүүтүгэр хас биирдии дьиэ кэргэн бэйэтин биисинэс-бырайыагын билиһиннэриэхтээх.
—Күөн күрэс сыала — элбэх оҕолоох дьиэ кэргэн бэйэтин дьыалатын тэринэригэр көмөлөһүү. Биһиги бу бырайыак дьиэ кэргэттэргэ билиилэрин-көрүүлэрин хаҥаталларыгар, биисинэс-бырайыактарын олоххо киллэрэллэригэр көмөлөһүө уонна урбаанынан дьарыктаналларыгар тирэх буолуо диэн эрэнэбит. Үөрэппит эспиэрдэр салгыы кинилэргэ настаабынньыктыахтарын сөп. Маннык үөрэтэр сыаллаах-соруктаах бырайыак биһиги Сахабыт сиригэр аан бастаан ыытыллар, — диэн сырдатар СӨ Предпринимательство, атыы-эргиэн уонна туризм миниистирин бастакы солбуйааччы Максим Кабушев.
Күөн күрэс түмүгүнэн кыайыылаахтары наҕараадалааһын Дьокуускайга балаҕан ыйын 19-23 күннэригэр буолуоҕа. Күөн күрэс «Дьоҕус уонна орто предпринимательство» национальнай бырайыагы олоххо киллэрии чэрчитинэн, Саха Өрөспүүбүлүкэтигэр Ийэ сылынан уонна САССР тэриллибитэ 100 сылынан ыытыллар диэн СӨ Предпринимательство министиэристибэтин саайтыгар суруллар.
+1
+1
+1
+1
+1
+1
+1