«Саха сирэ» хаһыат эрэдээксийэтигэр элбэх оҕолоох Поповтартан маннык ыйытыы киирдэ:
— Түөрт оскуолаҕа үөрэнэр оҕолоохпут. Ханнык эмэ аралдьытар кииҥҥэ эбэтэр тыйаатырга барыларын илдьэ бардахха, төлөбүрэ «тос» курдук буолан тахсар. Манна туох чэпчэтии баара буолаарай? Биһиги дьиэ кэргэҥҥэ оннук чэпчэтии олус көдьүүстээх буолуо этэ.
Бу ыйытыыга СӨ култуура министиэристибэтин пресс-сулууспатын үлэһитэ Наталья Чемашкина бу курдук хоруйдаата:
— Саха сирин Ил Дарханын “СӨ гражданнарын сорох категорияларын социальнай өйөбүл туһунан” диэн ыйааҕыгар суруллубутунан, Саха сирин үрдүнэн үлэлиир судаарыстыбаннай тыйаатырдар оонньуур репертуардарыгар элбэх оҕолоох ыаллар босхо эбэтэр 50% чэпчэтилээх сылдьыахтарын сөп. 18 саастарын ситэ илик 5 оҕолоох дьиэ кэргэн босхо киирэр бырааптаахтар, 3-4 оҕолоох дьиэ кэргэн билиэт сыанатын 50% чэпчэтиилээх ылыан сөп. Бу өҥөнөн хас да сыл устата куорат, улуус тыйаатырдарыгар элбэх ыал туһаннылар. Биири тоһоҕолоон этиэх тустаахпын, бу тыйаатыр бэйэтин репертуарыгар сыһыаннаах, гостуруолга кэлбит испэктээккэ уонна испээктээк премьератыгар чэпчэтии тарҕаммат.
Билигин тыйаатыр үксэ сезоннарын сабан сайыҥҥы сынньалаҥҥа тураллар.
edersaas.ru