Дьокуускай куорат 3 №-дээх балыыһата тэрийбит «Ийэ доруобуйата» аахсыйаны элбэх оҕолоох дьиэ кэргэттэр улаханнык сэргээтилэр, сэҥээрдилэр.
Бу туһунан тустаах балыыһа пресс-сулууспата иһитиннэрдэ. Аахсыйаҕа быраастар кыттыыны ылбыттар. Биир күн иһигэр отуттан тахса ийэ сылдьыбыт.
—Улахан дьиэ кэргэҥҥэ төрөппүттэр туох баар болҕомтолорун оҕолоругар уураллар. Онон биһиги ийэлэр доруобуйаларын көрдөрөллөрүгэр анаан «Ийэ доруобуйата» диэн аахсыйаны субуотаҕа тэрийэн ыыттыбыт. Аахсыйабытын улаханнык сэҥээрдилэр, сэргээтилэр. Ийэлэргэ сүбэ-ама бэрилиннэ, — диэн кэпсээтэ быраас Яна Острелина.
Бэлиэтээн эттэххэ, Ийэ сылыгар ийэлэргэ болҕомто өссө күүһүрдэ. Өрөспүүбүлүкэ мэдиссиинэҕэ тэрилтэлэрэ доруобуйаны чэбдигирдиигэ туһуламмыт тэрээһиннэринэн, диспансеризациянан эрэ муҥурдамматтар, өссө анал аахсыйалары көхтөөхтүк тэрийэллэр.