Элбэх оҕолоох ыал Саввиновтар оҕолорго бэлэх ууннулар (ВИДЕО)

Ааптар: 
Бөлөххө киир:

Мария, Платон Саввиновтар элбэх оҕолоох ыал, бэйэлэрэ эмиэ элбэх оҕолоох дьиэ кэргэҥҥэ төрөөбүттэр. Онон оҕо үөрүүтэ, чуопчаарар саҥата диэн тугун билэллэр. Оҕо көмүскэлин күнэ кинилэргэ улахан суолталаах. Ол да иһин үс-түөрт сылтан бэттэх, бу бэлиэ күн оҕолорго бэлэх оҥорор үтүө үгэстэммиттэр. Быйыл даҕаны ити үгэс кэспэтэхтэр.

edersaas.ru

Бүгүн, Оҕо көмүскэлин аан дойдутааҕы күнүгэр  Саввиновтар дьиэ кэргэн элбэх оҕолоох ыал оҕолоругар бэлэх оҥорбуттар диэн сонун иһиллээтин кытта,  булан кэпсэтэргэ соруннум. Кэпсэтэн билбитим, биир дойдулаахтарыгар Үөһээ Бүлүү Хоротун уонна Мэҥэ Хаҥалас Томторун оҕолоругар бэлэх ууммуттар.

Ыал аҕата Платон Егорович “Модун” спортсменнары бэлэмниир кииҥҥэ оҕолору эрчийэр, биллэр-көстөр хапсаҕайдьыт. Ыал ийэтэ Мария Кимовна туристическай фирма үлэһитэ. Сыллата бэс ыйын 1 күнүгэр оҕону үөрдэр үгэстээхтэр эбит.

Оҕо көмүскэлин күнэ биһиэхэ улахан суолталаах. Хас биирдии оҕо саамай күүтэр-кэтэһэр бырааһынньыга буолар. Бэйэбит элбэх оҕолоох ыалбыт. Сылын аайы доҕотторбут оҕолорун даачабытыгар ыҥыран бырааһынньыктатабыт. Быйыл коронавируһунан сибээстээн, түмэр кыаллыбата. Ол иһин кэргэммин кытта сүбэлэһэн баран, силистээх-мутуктаах дьон буоларбыт быһыытынан, биир дойдулаахтарбыт элбэх оҕолоох дьиэ кэргэттэрин кырачааннарыгар бэлэх оҥорорго быһаарынныбыт. Кэргэним Мэҥэ Хаҥалас Томторуттан, мин Үөһээ Бүлүү Хоротуттан төрүттээхпит. Инньэ гынан, олохтоох дьаһалталартан элбэх оҕолоох ыал испииһэктэрин ылан, бэлэх биэрдибит, ыыттыбыт. Оҕоҕо кыра даҕаны бэлэх улахан суолталаах, үөрүүлээх. Бу бэлэхпитигэр сайыннарар кинигэлэр, минньигэс, оонньуурдар бааллар.

Бэйэбит сахалыы куттаах ыалбыт. Иллэрээ сыл, былырыын даачабытыгар доҕотторбут оҕолорун мунньан, тэрээһин ыыппыппыт, оонньоппуппут, алгысчыты ыҥырбыппыт, олоҥхо истибиппит. Оҕо үөрэрэ — дьол. Кэргэним бэйэтэ даҕаны бу курдук тэрээһиннэри ыытарыттан үөрэр, —  диэн Платон Саввинов санаатын үллэстэр.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0