Элбэх кыбартыыралаах дьиэлэри салайар хампаанньалар түмсүүлэрэ тэриллиэҕэ
Элбэх кыбартыыралаах дьиэни салайар хампаанньа хайдах үлэлиириттэн, дьиэ фундамена, сыбаайата, истиэнэтэ хайа барыан, иҥнэри-хаҥнары түһүөн иннинэ сэрэтэр үлэни ыытарыттан дьиэ туруга улахан тутулуктаах. Куорат дьиэлэрэ ирбэт тоҥ үрдүгэр тураллар, ол кыратык ирдэ, итии-тымныы уу турбата тэстэн, үгүстүк тоҕунна даҕаны, сыбаайа хамсаабытынан барар.
edersaas.ru
Маннык түгэн тахсыбатын туһугар Салайар хампаанньа эппиэттиир. СИА иһитиннэрэринэн, кинилэр эппиэтинэстэрин үрдэтэр сыалтан Иван Захаров бэрэссэдээтэллээх Салайар хампаанньалар түмсүүлэрэ тэриллиэҕэ. Күн бүгүн түмсүүгэ 12 хампаанньа киирдэ. Ону дьүүллэһэр мунньахха куорат баһылыга Сардаана Авксентьева дьиэни бас билээччилэри хомунаалынай хаһаайыстыба боппуруостарын быһаарыыга кыттыһыннарыы, гааһы туттуу куттала суох буолуохтааҕын хааччыйыы, туттуллубат ситимнэри дьаһайыы, дьиэлэр тиэргэннэрин, подъезтарын ыраастык тутуу сүрүн суолталааҕын бэлиэтээтэ.
«Инникитин саахалланар туруктаах дьиэ аҕыйыахтаах, олохтоохтор сайаапкалара кэмигэр толоруллан иһиэхтээх уонна нэһилиэнньэ Салайар хампаанньа үлэтин үчүгэйдик сыаналыырын ситиһиэхтээхпит», — диэн түмүктээтэ кини.
Биһ.корр., edersaas.ru