Дойдуга COVID-19 элбии турарынан, социальнай үлэ сыһыаннаһыыларын бэрээдэктиир Арассыыйа үс өрүттээх хамыыһыйата тустаах докумуону бигэргэттэ.
Докумуон быһыытынан, үлэни биэрээччилэр төһө кыалларынан элбэх үлэһити ыраахтан олорон үлэҕэ көһөрөллөрүгэр этиллэр.
Ыраахтан олорон үлэ эрэсиимигэр көһөр үлэһит ахсаанын тэрилтэ бэйэтэ быһаарар.
Үлэһити ити эрэсиимҥэ көһөрүү хамнаһы кыччатарга төрүөт буолуо суохтаах. Үлэни тэрийии боппуруостара РФ Үлэҕэ кодексатынан бэрээдэктэнэллэр.
РФ Үлэҕэ уонна социальнай сайдыыга министиэристибэтэ бигэргэтэринэн, билигин Арассыыйаҕа 3 мөлүйүөн курдук киһи ыраахтан олорон үлэлиир.
Манна даҕатан эттэххэ, Саха сиригэр ыарыы тарҕаныытын бопсор Суһал штаб тохсунньу 17 күнүнээҕи быһаарыытынан, тэрилтэ салайааччылара алын кылаас оҕолорун төрөппүттэриттэн биирдэстэрэ ыраахтан олорон үлэлиирин көҥүллүөхтээхтэр.
Надежда ЕГОРОВА, «Саха сирэ», edersaas.ru