Элбэх киһини мунньар Саҥа дьыллааҕы тэрээһиннэртэн туттунуохха
Бүгүҥҥү сарсыардааҥҥы брифиҥҥэ Доруобуйа харыстабылын миниистирэ Елена Борисова Саҥа дьыллааҕы тыын кэлэн эрэринэн, дьон бырааһынньыктааҕы тэрээһиннэргэ бэлэмнэнэллэрин бэлиэтээтэ.
edersaas.ru
Төһө да күүтүүлээх бырааһынньык буоллар, уустук балаһыанньа бүрүүкээн турарын умнар сатамматын туһунан миниистир санаатын эттэ:
— Билигин Саҥа дьыллааҕы корпоративтары ыытыы туһунан толкуйданар дьону маассабай тэрээһиннэргэ сылдьартан туттунаргытыгар сүбэлиибит. Дьону сыстыганнаах ыарыыттан харыстыыр инниттэн, элбэх киһи мустуулаах бырааһынньыктары ыытыыттан аккаастанар ордук. Бүгүҥҥү күн көрдөрөрүнэн, ыарыы сүрүннээн дьиэ кэргэҥҥэ тарҕанар. Онон бэйэҕит чугас дьоҥҥутун, кырдьаҕастаргытын харыстааҥ, араас элбэх киһини мунньар тэрээһиннэри ыытыыттан пандемия кэмигэр туттунуҥ диэн көрдөһөбүт.
Бу күннэргэ Саҥа дьылы көрсө куйаар ситиминэн бэртээхэй тэрээһиннэр саҕаланнылар. Онон дьон мустар тэрээһинэ да суох, дьиэҕэ олорон онно кыттыахха, иллэҥ кэми туһалаахтык атаарыахха сөп. Кылаабынайа, чөл турук, доруобуйа!
Елена ПОТОЦКАЯ, «Саха сирэ» хаһыат, edersaas.ru
Хаартыска — liveinternet.ru