Бүгүн Саха Өрөспүүбүлүкэтин бырабыыталыстыбатын эпидемиологическай балаһыанньаны ырытар мунньаҕар Ил Дархан Айсен Николаев аан дойдуга тарҕаммыт коронавирус боппуруоһун таарыйда.
edersaas.ru
Айсен Сергеевич аан дойдуга ыксаллаах балаһыанньа үөскээбитинэн, успуор, култуура уонна уопсастыбаннай тэрилтэлэргэ дьон мустар маассабай тэрээһиннэрин тохтотор наадатын туһунан эттэ.
“Өрөспүүбүлүкэ таһымыгар элбэх дьон тоҕуоруһар улахан тэрээһиннэрин ыытыыны хааччахтыырга туһуламмыт кэккэ дьаһаллары номнуо ылыныахха наада”, — диэн үрдүк үөрэх кыһалара ыраахтан (дистанционнай) үөрэниигэ көһөллөрүн курдук быһаарыы ылылларын туһунан эттэ.
Ону сэргэ, оҕолору уонна араас бөлөхтөрү өрөспүүбүлүкэ таһыгар тахсалларын хааччахтыыр наадатын ыйда.
Өрөспүүбүлүкэ баһылыга эбэн эппитинэн, кыраныысса таһыттан кэлбит уонна ОРВИ ыарыы сибикилэрдээх 29 киһиэхэ коронавирус инфекцията баара бэлиэтэммэтэ. Биир киһи анаалыһа биллэ илик.
СӨ Роспотребнадзор управлениета иһитиннэрбитинэн, кулун тутар 14 күнүгэр өрөспүүбүлүкэ тэрилтэлэрин бары салайааччыларыгар сэрэтэр үлэҕэ эбии дьаһаллары ыыталларыгар дьаһал бэрилиннэ.
Надежда ЕГОРОВА, “Саха сирэ”, edersaas.ru
Андрей СОРОКИН түһэриитэ